Olbmot geat leat badjel 80 jagi boarrásat sáhttet oažžut koronaboahkuid njealját gearddi, dieđiha Álbmotdearvvašvuođainstituhtta.
Álbmotdearvvašvuođainstituhtta lea árvvoštallan ja gávnnahan ahte ii leat vuođđu boahkuhit buohkaid geat leat badjel 80 jagi boarrásat, muhto ahte lea vejolaš fállat 4. boahkkodosa dan ahkejovkui.
– Nu guhká go ii leat ávžžuhus váldit 4. koronaboahkkodosa, de ii leat dárbbašlaš ahte gielddat gohččot olbmuid boahtit boahkuheapmái, čállá Álbmotdearvvašvuođainstituhtta.
Seammás dáhttu Álbmotdearvvašvuođainstituhtta olbmuid, geain lea heajos imunasuodji, váldit 4. koronaboahkkodosa. Dat berre dáhpáhuvvat golbma mánu maŋŋel go lea ožžon 3. boahku.
– Hui oallugat leat váldán buot golbma boahkkodosa, muhto ain leat olu olbmot geain lea heajos immunasuodji, geat eai leat bijahan ođđa boahkuid. Mii sávvat ahte eanebut čuvvot dan ávžžuhusa vai livččii suddjejuvvon vel buorebut dávdda vuostá, lohká Álbmotdearvvašvuođainstituhta veahkkedirektevra Geir Bukholm.
(©NTB)
