Eanet nuorra nieiddat vásihit ahte mánnodávddat leat rievdan maŋŋel go ožžo Pfizer-boahkuid.
Álbmotdearvvašvuođainstituhtta lea guorahallan man láhkai Pfizer-koronaboahkut váikkuhit nuorra nieiddaid mánnodávddaide.
Lea dábálaš ahte nuorra nieiddain rievddadit mánnodávddat, muhto gaskal 12- ja 1-jahkásaš nieiddat, geat leat ožžon Pfizer-boahkuid, vásihit rievdadusaid dávjjit go earát seamma ahkeluohkás.
– 4,7 proseantta oasseváldiin muitalit ahte sin maŋimuš mánnodávddat ovdal koronaboahkuheami ledje garraset go dábálaččat. Maŋŋel boahkuheami vástidit 7,3 proseantta ahte vuosttaš mánnodávddat maŋŋel boahkuheami ledje garraset go dábálaččat, muitala Álbmotdearvvašvuođainstituhta prošeaktajođiheaddji ja doavttir Lill Trogstad.
Eanet nuorra nieiddat muitalit maid ahte mánnodávddat biste guhkit go dábálaččat, ahte mánnodávddat bohte dávjjit ja ahte leamaš garraset bákčasat mánnodávddaid geažil maŋŋel go boahkuhuvvojedje.
Stuora dutkamušat
Dat lea vuosttaš guorahallan mii lea čađahuvvon nuorra nieiddaid birra geat vásihit mánnodávdarievdadusaid maŋŋel koronaboahkuheami. Álbmotdearvvašvuođainstituhtta geažuha ahte lea dárbbašlaš čađahit eanet dutkamušaid vai sáhttet duođaštit daid gávnnahusaid.
2021 geasi dieđihedje vuosttaš nissonolbmot ahte vásihit rievdadusaid mánnodávddain maŋŋel go boahkuhuvvojedje.
Dán geažil lea Álbmotdearvvašvuođainstituhtta álggahan stuorebuš dutkama vai gávnnahivčče lea go koronaboahkuheapmi sivalaš mánnodávdarievdademiide. Badjel 60 000 nissona, gaskal 12-ja 80-jahkásaččat, oassálastet dutkamis.
