-Almmuhus-
-Almmuhus-
OĐĐASAT– Fága­beaivi lea mávsso­laš ja dehálaš

– Fága­beaivi lea mávsso­laš ja dehálaš

-

-

– Hui dehálaš go NBR lágida fágabeaivvi ja lean hui ilus go NBR stivra vuoruha dan, dadjá Buolbmát johttisámiid searvvi jođiheaddji Ánne Margrethe Gaup.

Norgga Boazosápmelaččaid Riikkasearvi (NBR) álggahii riikačoahkkima fágabeivviin. Muoffies, Nordlánddas leat dál boazosápmelaččat miehtá Norgga deaivvadan go dan vahkkoloahpa lágidit riikačoahkkima. Ievttá fágabeaivvis besse ge boazosápmelaččat gullat logaldalliid geat earret eará  muitaledje makkár hástalusat bohtet boazodoalus leat dálkkádatrievdama geažil.  Nordlándda heahtegearggusvuođajoavku muitala iežas vásáhusaid birra mo hálddašit roasuid boazodoalus. 

– Lea hui dehálaš go NBR lágida fágabeaivvi ja lean hui ilus go NBR stivra vuoruha dan. Dál beasaimet gullat mo heahtegearggusvuođajoavku lea doaibman Nordlánddas. Lea hui mávssolaš ja olmmoš álgá jurddašit, dadjá Buolbmát johttisámiid searvvi jođiheaddji Ánne Margrethe Gaup.

Olmmoš smiehttagoahtá

Ánne Margrethe Gaup muitala ahte fágabeaivi bidjá maid jurdagiid johtui, earenomážit dál maŋŋá garra dálvvi. 

– Dakkár fágabeaivi dahká ahte olmmoš álgá ráhkkanit, jurddašit ja maid dagaha ahte mii  sáhttit ovdagihtii bargagoahtit iešguđet hástalusaiguin mat čuožžilit boazodoalus. Ain lea olu maid mii fertet oažžut sadjái, muhto lea hui mávssolaš gullat vásáhusaid ja rávvagiid, lohká Gaup. 

Boazodoalloroasu váikkuhus báhcán muitui

 Hestmann/Strandtind  boazosápmelaš Ánne Lájlá Kappefjell Gaup (17) lea maid čuvvon fágabeaivvi, ja su mielas lea maid miellagiddevaš gullat iešguđet áigeguovdilis fáttáid.

 – Mu mielas gal lea dehálaš gullat áigeguovdilis fáttáid. Guohtonroassu lea dál báhcán mu muitui, mo dat lea čuohcan boazosápmelaččaide, lohká nuorra boazosápmelaš. 

ČUVVON FÁGABEAIVVI: Hestmann/Strandtind  boazosápmelaš Ánne Lájlá Kappefjell Gaup. Govven: Inga Marie Guttorm
ČUVVON FÁGABEAIVVI: Hestmann/Strandtind  boazosápmelaš Ánne Lájlá Kappefjell Gaup. Govven: Inga Marie Guttorm
Loga maid:
Gii oažžu luohttámuša jođihit NBR?

Válggat

NBR lágida riikačoahkkima geassemánu 17. ja 18. beaivvi Muoffies, Nordlánddas, gos earret eará galget válljet ođđa stivralahtuid ja jođiheaddji. 

-Almmuhus-