Anne-Grethe Leine Bientie ja Bierna Leine Bientie noveallačoakkáldat «Jeameme Mijjen luvnie jeala» lea evttohuvvon Davviriikkaid Ráđi girjjálašvuođabálkkašupmái.
Iđut lágádus almmuhii Anne-Grethe Leine Bientie ja Bierna Leine Bientie noveallačoakkáldaga «Jeameme Mijjen luvnie jeala» jagi 2022:s (davvisámegillii šattašii «Min gasku eallá jápmin». Noveallačoakkáldat lea maid almmuhuvvon dárogillii namain «Midt iblant oss lever døden» ja dan lea Norgga kulturráđđi oastán sisa. Girječálliguoktá nieida, Ellen Sara Reiten Bientie, lea sárgon govaid dasa.
– Noveallačoakkáldat «Jaememe mijjen luvnie jeala», man náittospárra Anne-Grethe Leine Bientie ja Bierna Leine Bientie leaba ovttas čállán, lea evttohuvvon Davviriikkaid Ráđi girjjálašvuođa 2023 bálkkašupmái, dieđiha Iđut lágádusa doaimmaheaddji Nan Persen preassadieđáhusas.
Davviriikkaid Ráđi 2023 bálkkašupmi geigejuvvo Den Norske Opera viesus Oslos boahtte maŋŋebárgga, golggotmánu 31. beaivvi, tiibmu 19.30. Doallogoddi lea Davviriikkaid Ráđi Norgga sáttagoddi. Girjjálašvuođa bálkkašupmi lea 300 000 dánskka kruvnna.
Norgga ráđđehus bovde buot gussiid Opera foajé stuorrafeaskárii vuostáiváldimii.
