«Vuoššat Guovžža» šaddá dál TV-ráidun Disney+ kanálas.
Mikael Niemi romána «Vuoššat Guovžža» lea historjádáhpáhus Davvi-Ruoŧas Kengis gilážis 1850-logus ja čuovvu dovddus báhpa Lars Levi Læstadiusa ja sámebártni Jussi go ohcaba vástádusaid manne nieiddat láhppojit gilážis.
– «Vuoššat Guovžža» saddá Disney+ vuosttas Davviriikkaid originála buvttadeapmin. Muitalus lea čieŋal ja máŋggabealat ja heive ollesolbmuide. Lean sihkar ahte muitalus viidát beaggá maid olggobealde Davviriikkaid, dadjá Vibeke Lia, Disney+ buvttadeaddji preassadieđáhusa bakte.
Emil Karlsen galgá neaktit sámi bártni Jussi. Dovddus Ruoŧa neavttár Gustaf Skarsgård neaktá fas báhpa Lars Levi Læstadiusa, dieđiha Disney+ preassadieđáhusa bakte.
«Vuoššat Guovžža» šaddá guđaoasat TV-ráidu ja báddemat álget geasset Suomas. Lea Anagram Ruoŧas mii galgá buvttadit ráiddu ovttas Suoma Helsinki Filmona Oy:in. TV-ráiddu galgá Trygve Allister Diesen bagadallat.
