Ráđđehus lea boahtte jagi stádabušeahttaevttohusa olis dadjan ahte sii šaddet dán bušeahtas garrasit vuoruhit, ja nu de sihkkasa NOAH eret stádabušeahtas.
Elliidsuodjalusorganisašuvdna NOAH evttohuvvo dál sihkastuvvot stádabušeahtas, dan čállá VG.
Maŋemus stádabušeahtas oaččui NOAH 730 000 ruvnno doarjaga, muhto dál, jus ráđđehus oažžu eanetlogudoarjaga stádabušeahta meannudeamis, de sihkastuvvo visot dat doarjja.
Eanandoalloministtar Sandra Borch mieđiha ahte dat lea sin departemeantta evttohus ja dat lei okta dain vuosttaš diŋggain maid sii leat evttohan.
NOAH leat geassán ráđđehusa diggái gumpe-bivdoáššis, mas ráđđehus leat miehtan unnidit gumpenáli mearriduvvon gumpeguovllus. Dainna vuittii NOAH dikkis.
Borch biehttala ahte dat lea mávssaheapmi sin bealis NOAH vuostá.
