Njukčamánu 11. beaivvi lágiduvvo Norgga musihkkagilvu Melodi Grand Prix, ja dán jagi lea fas sámi artista mielde gilvvus mii dollojuvvo Oslo Spektrumas.
Njukčamánu 11. beaivvi lágiduvvo Norgga musihkkagilvu Melodi Grand Prix, ja dán jagi lea fas sámi artista mielde gilvvus mii dollojuvvo Oslo Spektrumas.
Badjelaš duháha lávlaga bohte gilvui, ja lágideaddjit leat válljen logi lávlaga mat besset gilvalit beassat Eurovision Song Contest gilvui mii lágiduvvo Kiev gávpogis Ukrainas miessemánu, dieđiha NRK.
Lávlu Oslo Spektrumas
Sámi artista Elin Kåven lea beassan mielde gilvaleames beassat viidáset internašunála gilvvuide. Su ođđa joavkku namma lea Elin & the Woods.
Son lea Kárášjogas eret, ja lea ásahan sierra musihkkahámi, árktalaš folk-pop, mas son lávlu ja juoigá.
Son lea golbma skearru almmuhan, ja johtán iežas musihkain 12 riikkas maŋemus logi jagi.
Lávlla, mainna searvá MGP gilvui, lea son ráhkadan ovttas Robin Lynchain geainna álggii ovttasbargat 2015:s.
Lávlaga namma lea «First Step In Faith / Oadjebasvuhtii».
Ruoŧas maid guokte sámi gilvaleaddji
Ruoŧa bealde Sámis lea maid dovddus sámi gilvaleaddji, Jon Henrik Fjällgren, gii searvá fas Melodifestivalen lávlungilvui ovttas artisttain Aninia.
Roger Pontare lea maid viđát geardde mielde Melodifestivalenis, lávlagiin «Himmel och hav». Pontare lea guktii vuoitán, 1994:s ja 2000:s, ja gilvala nuppi oassegilvvus mii lea Malmös guovvamánu 11.beaivvi.
Rievdadan njuolggadusaid gilvvus
Riikkaidgaskasaš gilvvus leat 43 riikka mielde. Gilvu lea sturron ja eanet riikkat háliidit leat mielde gilvvuin.
Lágideaddjit leat rievdadan gilvvu njuolggadusaid diimmáža ektui. Dán jagi galgá internašunála jury leat mielde válljemis makkár njeallje lávlaga galget beassat Gollefinálii.
Loahpas leat dušše Norgga jienasteaddjit geat mearridit guđemuš artista galgá ovddastit Norgga Ukrainas.
LOGA MAID:
Diibmá ovddastii Unjárgga nieida Agnethe Johnsen Norgga go beasai internašunála lávlungilvui.
Buot Norgga oasseváldiid lávlagiid beasat gullat guovvamánu 15. beaivvi NRK siiddus.
