Mannan vahkkoloahpa masse 15 biilavuoddji vuodjenkoarttaideaset menddo alla leavttu geažil.
Mannan vahkkoloahpa masse 15 biilavuoddji vuodjenkoarttaideaset menddo alla leavttu geažil.
Mannan vahkkoloahpa dárkkistedje geaidnopolitiijat leavttu Háhttira ja Suoidneleavšši guovllus, ja ruhta gal skilihii stáhtakássii.
15 biilavuoddji šadde guođđit vuodjenkoarttaideaset politiijaide menddo alla leavttu geažil.
– 15 vuoddji lea olu. Politiijat leat leamaš offensiivat mannan vahkkoloahpa ja doallan siviila-dárkkistemiid, muitala Oarje-Finnmárkku politiijaguovllu operašuvdnajođiheaddji Andreas Vesterhus.
–Ekstrema leaktu
Alimus leaktu lei muhtimis guhte vujii 176,69 km/d:s 90-sonas.
– Go vuddjet badjel 160 km/d:s, de dat lea ekstrema leaktu. Mii diehtit ahte eatnašat geat vudjet Skáiddi ja Álttá gaskkal, vudjet garrasit. Danne eat leat datte hirpmástuvvan ge go ná olu koarttaid leat duoguštan, dadjá Vesterhus.
Eanet dárkkisteamit
Vesterhus čilge ahte Geaidnopolitiijat dat mearridit šaddet go eanet leaktodárkkisteamit dien guovllus.
– Muhto mii diehtit ahte dien guovllus sáhttit duoguštit oalle olu koarttaid. Dál go 15 koartta leat duoguštan de jáhkkimis Geaidnopolitiijat bidjet eanet dárkkistemiid diehko, lohká operašuvdnajođiheaddji.
Twittera bokte dieđihit politiijat ahte lávvardagas sotnabeaivái, duoguštedje 8 vuodjenkoartta dien guovllus ja alimus leaktu dien jándoris lei 176,69 km/d 90-sonas. Sotnabeaivve eahkeda dieđihedje fas duoguštan vel 7 vuodjenkoartta, alimus leaktu dan beaivvi lei ges 134 km/d 90-sonas.
