Finnmárkku politiijaguovllu geaidnopolitiija varas logut golggotmánu rádjái čájehit ahte 59 olbmo vuollel 25 jagi leat gávnnahallon vuodjimin juhkanvuođas. Olles diimmájagis eai gávnnahallon earágo 60 olbmo vuollel 25 jagi vuodjimin juhkanvuođas.
Maiddái riikadásis leat eanet vuollel 25-jahkásaš biilavuoddjit vuodján gárrenoaivvis. «Ung i trafikken» (Nuorra johtolagas)- prošeavtta ja kampánjja ovddasvástideaddjái, Liv Marie Bendheim, lea issoras gullat gallis leat váidon vuodjimis gárrenoaivvis, erenomážit go smiehtasta juovlabevddiid lágidemiid birra, čállá Ungitrafikken.no preassadieđáhusas.
– Dát logut leat balddihahttit. Mii han diehtit ahte juohke njealját duođalaš johtolatlihkohisvuohta dáhpáhuvvá dan dihtii go vudjet gárrenoaivvis, lohká Bendheim ja lasiha:
– Olusat jurddašit promilla ii bistte nu guhká rupmašis, eai ge ádde man jođánit dát sáhttá dagahit váralaš dilálašvuođaid johtolagas.
Dássážii leat 2 148 olbmo vuollel 25 jagi váidon go lea gávnnahallan vuodjimis juhkanoaivvis. Diibmá gávnnahalle 190 olbmo ja dat leat 17 proseantta eanet go diibmá riikkadásis.
– Golggotmánu lohppii leat 100 olbmo duššan, ja de gal galggašii jáhkkit ahte eambbosat eai vuolgge vuodjit go leat juhkan, lohká Liv Marie Bendheim.
