Measta buot juovlaborramuša leat dán jagi buvttadan Norgga boanddat, čájehit Eanandoallodirektoráhta logut.
– Vaikko lea leamaš lossa jahki eanadoalus go lea leamaš sihke goikkádat ja dulvi, de orru leamen nu ahte šaddá doarvái Norgga juovlaborramuš buohkaide dáid juovllaid. Nu šaddáge uhccán juovlabiebmoimporteren, dadjá Eanandoallodirektoráhta hálddahusdirektevra Jørn Rolfsen.
Norga lea bidjan eriid erttegiid importeremii juovlamánus, sihke EU:s ja Stuora Británnias. Diet earit geavahuvvojedje ollásit diibmá, muhto dán jagi orrot fievrredeamen unnit erttegiid daid eriid ektui. Erttegiid váilevašvuohta lea ovddit jagiid dagahan ahte tuollu lea vuoliduvvon juovllaid rádjái, muhto ii dat oro šaddame áigeguovdilin dán jagi ge. Dat mearkkaša ahte dán jagáš juovlaerttet lea oalle sihkkarit ráhkaduvvon Norggas.
