Eanandoallodirektoráhtta lea ávžžuhan buohkaid geat vánddardit mehciin vuhtiiváldit bohccuid beassážiid áiggi.
Dán jagi lea erenoamáš váttis guohtundilli eanaš bohccuide. Danne ávžžuha Eanandoallodirektoráhtta buohkaid geat leat meahcis beassážiid vánddardit ja muđui leat várrogasat bohccuid lahkosis, ja áinnas garvit bohccuid. Sii bivdet maid veaddit beatnagiid.
– Dál lea guohtunroassu ja oallut bohccot rahčet heajos guohtuma dihte. Lea jiekŋa ja garra muohta. Stuora osiin Nordlánddas, Romssas ja Finnmárkkus lea guohtunroassu julggaštuvvon, nu ahte dáin guovlluin lea erenoamáš dehálaš leat várrogas. Oktiibuot leat sullii 110 000 bohcco maidda roassu guoská, ja dát bohccot leat de hui hearkkit, dadjá Eanandoallodirektoráhta boazodoalloossodaga direktevra, Widar Skogan preassadieđáhusas.
Ávžžuhit garvit
Bohccuin mat nelgot leat unnit fámut ja dat leat rašibut go dábálaččat. Danne lea dehálaš leat várrogas ja vuhtiiváldit, iige balddihit bohccuid.
– Jus leat meahccái, skuteriin dahje čuoigga, de lea dehálaš leat várrogas bohccuid lahkosis. Doalat buori gaskka, veatte beatnagiid ja jus deaivvat bohccuid, de jorgal dahje garvve, dadjá Skogan preassadieđáhusas.
