Eanandoallodirektoráhtta juolluda 17 miljárdda ruvnno buvttadan- ja sadjásašdoarjjan Norgga boanddaide.
Dat lea doarjja mii sohppojuvvui diimmá eanandoallošiehtadusas mii dál boahtá boanddaid konttuide. Submi lea sullii guokte miljárdda ruvnno eanet go diibmá máksojuvvui.
Eanandoallo- ja borramušministtar Geir Pollestad (GB) dadjá ahte lea dehálaš ráđđehussii loktet Norgga boanddaid dienasvejolašvuođaid.
– Doarjjalassáneapmi, mii dál máksojuvvo guovvamánus, lea boađus das go ráđđehus lea vuoruhan Norgga borramušbuvttadeami, dadjá son.
Lagabui 37 200 eanandoallofitnodahkii máksojuvvo buvttadan- ja sadjásašdoarjja dán vahkku. Ohcamat jagi 2023 rájes leat vuođđun máksimiidda.
– Mii diehtit ahte ollu boanddain lea lossa ruhtadilli dán áigodagas jagis, ja dál máksojuvvojit doarjagat mat sohppojuvvojedje miessemánus. Doarjagat leat dehálaš oassin boanddaid dienasis ja leat maid dehálaččat vai ožžot luomu ja astoáiggi, joatká Pollestad. (©NTB)
