Maŋemus mánu leat dieđihuvvon máŋga eanandoarggástusa Gironis. LKAB ruvkefitnodat váldá duođas daid dáhpáhusaid.
LKAB ruvkefitnodat čállá iežaset neahttasiiddus ahte leat dáhpáhuvvan ovcci seismalaš dáhpáhusa suoidnemánus gitta nuppi beaivái borgemánus.
Maŋemus eanandoarggástus lei mannan ija ja das lei magnituda 1,68 báikkálaš mihtidanskálas.
– Dáhpáhus geavai meastta duhát mehtera eatnan vuolde ruvkkes, mannan ija ovtta áiggi ihkku. Dat dovdui eanemus Bromsgáhtas Gironis. Nu guhká go mis lea ruvke ja bávkalit eatnama vuole, de bohtá eanan doarggistit, čállá LKAB fitnodat preassadieđáhusas.
Unohas
LKAB fitnodat čállá ahte eanandoarggastusat sáhttet leat unohasat ja sáhttet dovdot bures orohagaide ja ásodagaide Gironis.
– Mii váldit daid eanandoarggastusaid duođalaččat. Leat geađggit mat lihkadit ja nu energiija luovvanan. Lea deaŧalaš muitit ahte LKAB ii viečča málmma doppe gos olbmot orrot. Dat dáhpáhusat leat min industriijaguovlluin, čállet sii preassadieđáhusas.
