8 gažaldaga maid Nussir ASA dál guktii ii leat vástidan.
Nu go eanaš lohkkit dihtet, lea Nussir-fitnodat 2005 rájes plánen veaikeruvkke Riehpovutnii. Vuosttáš fanas veaikekonsentráhtain galggai plána mielde vuolgit Riehpovuonas jagis 2011. Dán rájes lea áigeplána rievdaduvvon jagis jahkái. Váikko doaibmakonsešuvdna addojuvvui juo 2019:s. de ii leat vel 2023 loahpas čielggus goas ruvke álggahuvvo dahje šaddá go obage ruvke. Direktevra, gii ovdal leamaš hui áŋgir hupmat mediain, orru dál čákŋan bidjui ja go muhtun geahččala jearrat sus, de sus ii leat mihkkege muitalit.
Nussir ASA lea jávohaga. Dalle mis ii leat ođas, jurddašit aviissain, rádios, neahttamediain. Ii go? Jus medias livčče stuorit ambišuvnnat go doaibmat mikrofuvnna holgan, de sii berrešedje beroštit das manne Nussir ASA:s ii leat mihkkege maid muitalit. Go prošeakta, mii galggai leat njunuš sihke 2013 ja 2015 minerálastrategiijain ja ruoná molsašumis, lea unnimusat 14 jagi plána maŋŋá, ja sis ii leat eambbo maid muitalit go dan maid sii leat dadjan buot dáid jagiin, ahte gal sii álget boahtte jagi, ii go dát lea ášši mediaide?
Mánu áigi ledjen mielde jearaheame mii Nussiris lea muitalit. Ii oktage vástádus. Guokte vahku maŋŋil deattuhin ođđa čállosis: Nussiris ii leat mihkkege maid muitalit! Ii oktage vástádus, ii ge ovdamanni fitnodagas, ii oktage sin máhttajeddjiin ge geahččalan vuosttaldit maid čállen.
Finnmark Dagbladet aviisaarkiivva mielde leat sis 1353 čállosa Nussira birra. Maŋimus lei mu čálus 16.11.2023. Dan maŋŋá ii leat Nussir namahuvvon aviissas. Eará mediat eai lean dahkan ollu eambbo.
Maŋimus háve ovdal mu čállosa go Nussir namuhuvvui FD:s, lei muhtin lohkki gii čálii ahte dál fertet gáibidit ahte Nussir álggahuvvo. Smiehtan geas galgá gáibidit dan. Ráđđehus lea addán lobiid, ii leat doppe gos bissehuvvo. Gos dalle?
Gažaldagat, maid Nussir ASA dál guktii ii leat vástidan, leat:
1. Lea go Nussir ASA dál viimmat ožžon ruhtadeami maid lea ohcan 15 jagi?
2. Lea go Nussir ožžon ođđa oasti maŋŋil go Aurubis geassádii?
3. Lea go Nussir viimmat mearridan galgá go proseassarusttet leat Margohpnjárggas vai Øyenis?
4. Lea go Nussir ožžon elfápmokonsešuvnna NVE:s?
5. Lea go Nussir addán minerálabázáhusplána ja lea go dat dohkkehuvvon?
6. Lea go Nussir buktán ođasmahtton doaibmaplána?
7. Lea go Nussir ožžon šiehtadusa boazodoaluin vai mearridan gáibidit ekspropriašuvnna?
8. Lea go Nussir ožžon vuoigatvuođa (festerett) guovlluide maid galgá geavahit ruvkii?
Ovdal go Nussir sáhttá álgit de fertet positiivvalaččat máhttit vástidit buot dáid gažaldagaide. Jus eai hálit ieža vástidit, de sáhtán veahkehit ja muitalit mo dilli lea ovttain dehálaš áššiin, mo manná elfápmokonsešuvnnain. Elfápmokonsešuvnna haga ii šatta elfápmu, ii makkarge «máilmmi vuosttáš ollásit elektralaš veaikeruvke».
Njukčamanus dán jagi ozai Nussir elfápmokonsešuvnna. Miessemánu vástidii NVE ja jearai buorit kárttaid, guorahallamiid areála ja birrasa birra ja šiehtadusa boazodoaluin. Čakčamánu ođasmahtii Nussir ohcama ja skábmamánus ožžo vástádusa fas NVE:s mii celkkii ahte Nussir ii leat vástidan maid sii jerre. Ja das de orru dát ášši.
Orru danin manname vel muhtin mánuid ovdal go NVE šaddá dohkkehit ohcama ja bidjat dan guhkes ráidui mas konsešuvdnaohcamat vurdet. Dábálaš vuordináigi doppe lea gaskal jahkebeale ja olles jahki. De ohcan galgá gulaskuddamii, ovdal go NVE mearrida, ja jus dohkkehuvvo, de sihkkarit váidojuvvo departementii. Easká go OED lea dohkkehan, de sáhttet dalle huksegoahtit transformahtorvistti. Easká go transformahtor doaibmá, de sáhttet gealdigoahtit elektralaš rusttetmašiinnaid mat galget ráhkadit tuneallaid veaikemálmma guvlui. Lea go ain oktage gii jáhkká ahte Nussir beassá álgit 2024:s?
Dál guođán roggi journalisttaide gávdnat vástádusaid eará 7 gažaldahkii. Galgabehtet velá oažžut liigegažaldaga: Mii lea boahtán dan guorahallamis olmmošvuoigatvuođa birra, maid Nussir diŋgui diibmá?
