-Almmuhus-
OĐĐASATEai nu galle nissona dákkáriid duohken dán giđa

Eai nu galle nissona dákkáriid duohken dán giđa

-

-

Berit Inga (44) lea okta dain nissoniin geat leat ožžon loddenlobi Guovdageainnu suohkanis dán giđa.

Mannan ija álggii giđđaloddenáigodat Guovdageainnus, dat bistá gitta geassemánu 3. beaivái diibmu 24.00 rádjái.

Dán beaivvi leat olusat vuordán, muhto eatnašat sis leat almmáiolbmot.

Listui, mii čájeha geat leat ožžon loddenlobi, leat 119 olbmo beassan. 13:s sis leat nissonat.

 

– Galggašedje eambbosat


Berit Inga P. Gaino. Priváhtagovva

– De gal leat oalle unnán nissonolbmot, soaittán vel nuoramusaid searvvis, lohká Berit Inga P. Gaino (44) guhte lea okta dain nissoniin geat dán jagi ožžot searvat giđđaloddemii.

– Lea gal hui somá gullat ahte leat nissonolbmot ohcan ja ožžon lobi. Muhto galggašedje gal eambbosat, oaivvilda son.

 

Vuosttaš geardde searvamin

Berit Inga muitala iežas vuosttaš geardde searvamin loddemii.

– Mun lean gal leamaš mielde ovdal ja čuvvon loddejeddjiid, muhto diibmá de čađahin bivdogeahččaleami, nu ahte dál lea lohpi mus báhčit, čilge son.

Son lohká loddema mearkkašit alcces hui olu ja dál lea gealdagasas ovdal go galgá gealdit bissu.

– Lea hui miellagiddevaš oaidnit mo dat šaddá. Mus galget gal hárjánan loddejeaddjit mielde, okto in vuolgge gal.  De lea oaidnit duosttan go báhčit. Dan in dieđe vuos, čaibmá ieš.

Dat geat leat ožžon loddenlobi besset báhčit guokte dahje ovtta lotti, Berit Inga oažžu báhčit guokte.

– Ii leat gal nu mo áhčči lávii muitalit dološ loddemiid birra, muhto gal dat lea juobe smáhkameare ge, lohká son.

 

– Ovdal eai láven

Sámi bivdo- ja meahcástansearvvi jođiheaddji Guovdageainnus, Johan Ingvald Hætta, mielas eai leat gal unnán nissonat beassan loddemii.

– Go mun bajásšadden, de eai láven beare galle nissona gal loddet, nu ahte go dien logu gullen, de in jurdilan ahte lea erenoamáš, čilge son.

– Muhto dán áigge lea rievdan máilbmi ja de soitet eambbo nissonat maid searvagoahtán, lohká son

Son ii hálit gal árvvoštallat galggašedje go eambbo nissonat loddegoahtit, go lohká dan fertet leat juohkehačča duohken mearridit.

Muhto jus leat árvvoštallamin loddegoahtit, de eai leat nu olu rusttegat mat adnojit:

– Ii adno eará go bissu, čohkkánloddi, fanas kánske ja dohkkehuvvon bivdogeahččaleapmi, lohká son.

-Almmuhus-