Njeallje bargi heaitán oanehis áiggis.
Sámi oahpahusguovddáža stivra, Johkamohkis, lea mannan vahkku doallan heahtečoahkkima sivas go njeallje bargi, 13 bargis, leat dán čavčča cealkán eret ja heaitán iežaset virggiin.
Stivrra jođiheaddji, Mariana Wiik, lohká SVT Sápmái ahte sii váldet duođalažžan ášši go nu máŋggas heitet oktanaga ja lohká sin áigut guorahallat ášši. Stivrajođiheaddji lohká maid váldán oktavuođa fitnodatdearvvašvuođabálvalusain.
– Mun in háliit inge mun sáhte kommenteret bargiidáššiid dađi eambbo, dadjá Wiik.
Stivrajođiheaddji ii loga diehtit movt dát ášši čuohcá doibmii ovddosguvlui, muhto lohká oahpahusa joatkit nu movt dábálaččat.
