Johkamohki gielddajođiheaddji Henrik Blind (45) lea evttohuvvon Birasbellodaga jođiheaddjin.
Blind lea miehtan geahččalit beassat Ruoŧa birasbellodaga váldojođiheaddjin. Blind sáhttá nu šaddat vuosttaš sápmelaš gii jođiha riikabellodaga Ruoŧas.
Diibmá riikaválggain son oaččui 11,3 proseantta jienain Birasbellodahkii.
– Lea deaŧalaš ahte min jietna maid gullo. Mii eallit guovllus gos leat eanemus dálkkádatrievdamat. Danin háliidan álgit Birasbellodaga váldojođiheaddjin. Ruoná nuppástus váikkuha buohkaid, ii dušše industriija, ja ferte addit saji maiddái lundui ja birrasii, celkkii son SVT Sápmái.
Ruoŧa riikabellodat Birasbellodat vállje ođđa váldojođiheaddji bellodaga váldočoahkkimis skábmamánus.
