Dál vuos son bargá Johkamohki gielddaráđi virggis.
– Mun lean easká dál ožžon jeraldaga. Dál mun galggan váldit áiggi maid dárbbašan. Jurddašit gos mun háliidan leahkit, gos mun dagan buot buoremus barggu. Mus lea jo dál máilmmi suohttaseamos virgi, gielddaráđđi dás Johkamohkis, ja dat lea maid bargu man mun anán hui dehálažžan, dadjá Henrik Blind Sámerádioi.
Nominašuvnna birra álggos politihkkár almmuhii iežas Instagram-siiddu bokte. Sus leat guokte vahku nominerema ektui smiehttat. Birasbellodaga riikačoahkkin lea skábmamánus, nu go Sámeradio dieđiha.
Mannan jagi Blind lei Birasbellodaga riikalisttus Riikabeaiválggaide, muhto ii son beassan Ruoŧa parlamentii dalle.
