Ráđđehus evttoha 127 miljovnna ruvnno doarjjan rusttegiidda vai lea vejolaš skuvllas fállat eanet praktihkalaš oahpahusa.
– Skuvlaárgabeaivvis mánát čohkkájit beare olu ja lea unnán variašuvdna ja praktihkalaš oahppan. Skuvllat miehtá riikka muitalit ahte sii dárbbašit eanet resurssaid reaidduide ja molssaevttolaš oahppanarenaide vai sáhttet addit ohppiide vejolašvuođa oahppat sihke oaivvis ja gieđain. Dan mii guldalit. Danne mii árvalit várret 127 miljovnna ruvnno doarjjaortnegii mii galgá dahkat skuvlla eanet máŋggabealagin, nu ahte oahppit sáhttet oahppat eanet buot fágain ja loaktit buorebut, cealká máhttoministtar Tonje Brenna (Bargiidbellodat) preassadieđáhusas.
Ráđđehus čilge ahte doarjja juhkkojuvvo suohkaniidda/gielddaide merkejuvvon doarjjan vuođđoskuvllaid 5.-10. luohkáid ohppiid logu mielde. Suohkanat gos leat sullii 1000 oahppi, ožžot birrasii 300 000 ruvnno doarjjan. Seammás dáhkiduvvo unnimus suohkaniidda unnimusat 10 000 ruvnno doarjjan.
