Politiijaallaskuvllas vásihit ahte olles 22,5 proseantta unnit ohcama leat ožžon skuvlii. Dan čájehit logut mat almmuhuvvojedje njukčamánu 1. beaivvi.
Logut čájehit ahte skuvla lea ožžon dušše 2893 ohcama mii lea 842 unnit ovddit jagi ektui. Politiijaallaskuvla ii goassige ovdal leat vásihan dakkár vuollegaš loguid dan rájes go skuvla lea šaddan oassin oktiiheivehuvvon sisaváldima vuogádahkii 2009 rájes.
– Vaikko dán jagi mii vásihit njiedjama ohcciid dáfus, de lea illudahtti go ain ollugat árvvoštallet šaddat politiijabálván. Muhto leat leamaš olu digaštallamat ja stuimmit earenoamážit das mii guoská bargovejolašvuođaide sidjiide geat aiddo leat geargan politiijaskuvllas. Mii ipmirdit ahte dat sáhttá váikkuhan dasa ahte mis leat dakkár ohcciidlogut, muitala allaskuvlla sisaváldima ja rekrutterema doaibmi sekšuvdnajođiheaddji Thale Kvaal Dunker preassadieđu bokte.
– Mis leat ain olu ohccit oahpposajiid ektui. Diibmá ledje sullii 7,5 ohcci oahpposaji ektui. Dán jagi leat 5,8 ohcci juohke oahpposadjái, dadjá son.
74 proseantta vuoruhit politiijaoahpu
Skuvllas muitalit ahte ain olusat vuoruhit sin skuvlla ja háliidit doppe oahppat. Golmmas njealji ohccis bidjet skuvlla vuosttaš sadjái vuoruheamis. Bealli sis geat dahket dan leat sii geat ásset Oslos.
Akershusa, Oslo ja Vestlándda guovlluin leat boahtán eanemus ohcama. Muhto jus geahččat olmmošlogu ektui, ahte galle ohcama leat juohke 10 000 ássi nammii, de lea veahá eará govva.
– Telemárkkus, Akershusas, Innlánddas ja Finnmárkkus leat eanemusat ohccit, muitalit Politiijaallaskuvllas.
Sohkabealli
Sohkabealli ohcciid gaskkas lea dásset. Dán jagi 2893 ohccis leat 57,2 proseantta nissona ja 42,8 proseantta dievddu.
