Deanu Sámelistu dieđiha sii dorjot NSR-Nuoraid geat ovttasráđiid Natur og Ungdom servviin čájehit vuosteháguset ráđđehusa vuostá go eai leat čuovvolan Alimusrievtti duomu maid Fovsen-sápmelaččat vuite 2021:s. Seammás ávžžuhit politihkalaš bellodagaid Finnmárkkus čuovvolit sin.
Deanu Sámelistu dieđiha ahte sii dorjot NSR-Nuoraid geat ovttasráđiid Natur og Ungdom servviin čájehit vuosteháguset ráđđehusa váilevaš Alimusrievtti duomu čuovvoleamis maid Fovsen-sápmelaččat vuite 2021:s. Dat miellačájeheapmi ferte leat oalle heahpatlaš ráđđehussii, čállá bellodat preassadieđáhusas.
Lea mannan badjel 500 beaivvi dan rájes go duopmu celkui. Duopmu deattuha ahte bieggafápmorusttet loavkašuhttá Fovsen-sápmelaččaid olmmošvuoigatvuođa ja eamiálbmotvuoigatvuođa doaimmahit sin árbevirolaš boazodoalu.
– Nuorat leat jálut ja sis lea riekta cuoigut ahte stáhta lea rihkkumin sihke olmmošvuoigatvuođaid ja eamiálbmotvuoigatvuođaid. Deanu Sámelistu gáibida ráđđehusa dakkaviđe heaittihit olmmošvuoigatvuođarihkkuma, čállá Deanu Sámelisttu stivrra Máret Guhttor bokte preassadieđáhusas.
Gáibidit bieggaturbiinnaid njeidot
Deanu Sámelistu doarju akšunisttaid gáibádusa ahte bieggaturbiinnat galget njeidot ja guohtumat galget divvojuvot ja addit dan ruovttoluotta Fovsen-njaarke árbevirolaš boazodollui.
Lea bávččas oaidnit ahte min nuoraid mielas lea dárbu doaimmahit siviilla jeagohisvuođa go riektestáhta Norga ii čuovo iežas álbmotrievttálaš geatnegasvuođaid iežas eamiálbmoga vuostá iežas riikkas. Nuorat oidnet sii bággehallet gurput stuorraservodaga boasttuvuođa. Lea heahpatlaš ahte stáhtaministtar ja oljo- ja energiijaministtar eai áno ándagassii ráđđehusa sealggahisvuođa Alimusrievtti duomu čuovvuleamis ja departemeantta boasttumeannudeamis go adde konsešuvnna bieggafápmorusttegii. Dat 115 bieggaturbiinna mat leat Fovsen-njaarkes leat danin eahpegustojeaddjit ja lobiheamet ceggejuvvon.
Media bokte leat mii beassan sihke oaidnit ja gullat ráđđehusa dárpmehis áirasiid. Sii eai háliit luoikat bealji ahte nu guhká go diktet bieggaturbiinnaid jorrat, de rihkkot sii olmmošvuoigatvuođaid ja eamiálbmotvuoigatvuođaid.
Balddihahtti boahtteáigi
Deanu sámelistu čevllohallá go nuorra akšunisttat čájehit iežaset vuoimmi Oslos!
Sii bajidit jiena go boazodoallu manaha guohtumiid Fovsen bieggafápmorusttegiidda. Fovsen-njaarka hearkkes máttasámekultuvra ja árbeguoddi lea áitojuvvon. Dát áitta lea logemat jagiid bistán. Seamma dilli lea maid vuordimin iežamet boazodoallosápmelaččaid Finnmárkkus gosa ođđa bieggafápmorusttegat ja eará areálasisabahkkemat plánejuvvojit. Huksejeaddjiid deaddu lea stuoris ja balddihahtti!
Sápmelaččaid luohttevašvuohta Norgga riektestáhtii lea dál garrasit raššon, erenoamážit go stáhta ii áno ándagassii, iige váldde ovddasvástádusa njulget iežas meattáhusaid mat leat dolvon dakkáraš bissovaš heahpatlaš dillái.
– Mii giitit buohkaid geat akšunerejit sámiid boahtteáiggi ovddas ja buohkaid geat leat Oslos doarjumin, jeđđemin ja movttáskahttimin dán dehálaš ja mearrideaddji giččus gos min nuorra akšunisttat dál leat, čállá Deanu Sámelistu preassadieđáhusas.
