Sámediggeráđđi lea juolludan oktiibuot 1 624 300 ruvnno gávcci sierranas doaibmabidjui «Máŋggabealát ealáhusat» ortnega bokte.
– Lea movttiidahtti oaidnit ahte ihtet máŋggalágan ealáhusat sámi guovlluin. Mun lean ilus go Sámediggi lea mielde loktemin smávva fitnodagaid nu ahte dat sáhttet čađahit iežaset prošeavttaid. Fitnodatovddideami máŋggabealátvuođas ja girjáivuođas lea ovdánanvejolašvuohta ja barggolašvuohta, dadjá sámediggepresideanta Silje Karine Muotka (NSR) preassadieđu bokte.
Vihtta fitnodaga leat ožžon doarjaga mátkeealáhusbuktagiid ovddideapmái.
– Mátkeealáhus Sámis lea ealáhus mii ovdána, ja das leat stuora vejolašvuođat. Dan oaidnit viidodagas dain iešguđet ohcamiin. Mun sáhtán namuhit ovdamearkan Arctic Nuvsvåg AS mii lea ožžon 70 000 ruvnno viiddidit iežas doaibma- ja konseaptafálaldaga. Fitnodat háliida fállat holisttalaš yoga ja mindfullness konseapta 2024 geasi rájes, mas mediteren, yoga ja mindfullness doaimmahuvvo olgun dan earenoamáš luonddus ja jaskesvuođas mii birastahttá Cuokcavuona, dadjá sámediggepresideanta Muotka.
Gievkkan, goahti ja ovdaprošeakta
Guokte fitnodaga leat ožžon doarjaga gievkkanprošeavttaide. Varanger Brygge Eiendom AS lea ožžon juolluduvvot 347 000 ruvnnu kursagievkkanprošektii. Varanger Brygge AS háliida viiddidit fálaldagaid iežaset gussiide kursagievkkana bokte. Visttis galget leat guollečoallunlatnja, resepšuvdna, lounge, hivssegat ja gievkkan. Kursagievkkanis háliida fitnodat fállat biebmoráhkadankurssaid gussiidasaset.
XLyngen AS lea ožžon 500 000 ruvnno hukset stuoragievkkana mas lea gullevaš guossohansadji, restauráŋŋa, ođđa profiilla ja sávnnji. Prošeavtta ulbmil lea geasuhit eanet kundariid/turisttaid fitnodahkii. XLyngen lea Davit-Ittarvuonas, Ivggu suohkanis.
Mikkelvik Eiendom AS, mii lea turismadoaibma Hansnesas davábealde Romssa, lea ožžon 136 500 ruvnno goahteprošektii. Sii háliidit viiddidit iežaset fálaldaga dainna lágiin ahte hukset sámelágan bartta/goađi. Prošeavtta ulbmil lea gaskkustit sámi kultuvrra riikkaidgaskasaš gussiide ja seailluhit ja dohkkehit sámi kultuvrra historjjálaš sárgosiid báikkis.
Olderfjord Turistsenter AS Porsáŋggu gielddas lea ožžon 387 000 ruvnnu ovdaprošektii mii galgá ovdánahttit fitnodaga buktagiid. Fitnodat jođiha turistarusttetguovllu Ruoššanjárggas Porsáŋgguvuonas.
Divodanbálvalusat, filbma ja fierpmit
Guokte fitnodaga Guovdageainnus leat ožžon doarjaga doaibmabijuide. Divvun AS fitnodat lea ožžon 82 400 ruvdnosaš doarjaga divodanreaidduid investeremii. Fitnodat lea aiddo álggahuvvon ja galgá doaimmahit karosseriijabargguid ja eará divodanbálvalusaid. Dasa lassin lea govvagiisá Svein Solheim ožžon 62 000 ruvdnosaš doarjaga oastit rusttegiid iešguđetlágan filmmaid/jearahallamiid ja duođaštemiid buvttadeami várás.
Earát geat leat ožžon doarjaga Máŋggabealat ealáhus ortnega bokte lea Nordnes Garnmontering, mii lea ožžon 39 000 ruvnno firpmiid válbmenmašiidnii.
