Dánmárkku davviriikkalaš ministtar, Mogens Jensen, jođihii Davviriikkalaš ovttasbargoministariid diehtojuohkinčoahkkima mo eastadit koronavirusa leavvama.
Davviriikkalaš Ministtarráđđi dieđiha iežaset ođassiiddus ahte stuorra oassi digaštallamis lei man dehálaš lea heivehit doaibmabijuid ráddjen dihtii negatiivva váikkuhusaid rádjárasttildanbargiide ja gávppi gaskal davviriikkaid.
Ministarat deattuhedje man dehálaš lea joatkit ámmátolbmuid lávdegottiid ja ministtarráđiid, muhto iešguđet báikkis, vai gerget bušeahtta- ja doaibmaplánain 2030 áigumuša ektui.
Davviriikkalaš váldočálli Paula Lehtomäki oassálasti maid čoahkkimis.
– Maiddái dán mearkkašahtti dilis go iešguđet riikkat vuoruhit COVID-19, de lea min davviriikkalaš mearrideddjiin stuorra ávki lonuhit nubbi nuppi gelbbolašvuođa ja vásáhusaid, nu mo otná čoahkkin čájehii, logai Lehtomäki čoahkkimis mannan duorastaga.
