Juohke nubbi ballá divrriid čuovvut mielde go ollet ruoktut maŋŋel mátkkošteame. Dáhkádusfitnodat rávve movt garvvát vahátdivrriid.
If dáhkádusfitnodat dieđiha ahte Norgalaččat ballet vahátdivrriin, dárogillii veggedyr, skjeggkre ja kakkerláhkáin.
YouGov lea čađahan iskosa dáhkádusfitnodaga ovddas, masa 1012 olbmo olles Norggas serve.
51 proseanta ballet ahte vahátdivrrit čuvvot gálvvuid mielde ruoktot. 42 proseanta ballet vahátdivrriin skjeggkre ja 35 proseanta ballet kakkerláhkát čuvvot ruoktot.
– Vuosttaš ráva: Luomus it galgga bidjat iežat koaffara seaŋgga ala. Veggedyr liiko suotnjat ja čiehkadit baskkes lanjaide. Dat leat eanaš áigge seaŋggas ja das lahka. Sáhttet jođánit livkáhit koaffara sisa, lohká If gulahallanhoavda Sigmund Clementz preassadieđáhusas.
– It soaitte fuobmát vahátdivrri, skjeggkre dahje kakkerláhkká lea čuvvon ruoktot ovdal máŋga mánu maŋŋel go lea juo laskan, lohká son.
If dáhkádusfitnodat muittuha maiddái geahččat iežat stohpogálvodáhkádusas vahátdivrriidjávkadeami birra.
Ná garvvat vahátdivrriid:
• Geahča boalstara ja seaŋgga vuolde oainnat go divrriid ja daid bázahusaid.
• Geahča baskkes ráiggiin seaŋggas ja lovttohala seaŋgagávnniid. Suffa ja stuoluid iskkat maid.
• Go iskkat seaŋgga ja eará, ane telefovnnas čuovgga.
• Ale bija biktasiid skábiide ja skuffaide jus viessogálvu orro boaris dahje olu adnon.
• Ale fárre latnjii jus gávnnat vahátdivrri dahje luottaid eará vahádivrriin. Gáibit ođđa lanja dahje idjadanbáikki.
• Ane koaffariid ja seahkaid gitta, ja ale lebbe biktasiid miehtá. Muitte fal dat divrrit besset skuovaid sisa maid.
• Bija áinnas giddejuvvon koaffara koaffarholgii, jus dakkár gávdno lanjas.
• Go ruoktot joavddat, berret gálvvuid nuollat hivssegis dahje bassanlanjas, dahje buot buoremusat olgun. Savnnje biktasiid bures.
• Jus ovdamearkka dihte vahatdivrrit galget jávkat, de fertejit biktasat bassojuvvot 60 grádas.
