IF dáhkádusfitnodat ballá ahte dán geasi šaddá olu deaddu gáržžes luottaide ja bivnnuhis bisánansajiide ja turistabáikkiide.
IF dáhkádusfitnodaga diehtojuohkinhoavda Sigmund Clementz lohká ahte dán geasi gártet eambbo biilamátkkit ruovtturiikkas olusiidda. Go leat eambbogat luottaid alde ja bisánanbáikkiin, de roakčanit maid biillat eambbo.
– Muhtin turistabáikkiin leat buorit bisánanbáikkit, ja eanaš stuorra olgoriikka turistabussiiguin eai boađe deike, nu ahte sáhttá mannat bures. Mii diehtit juste dál ahte máŋgga bisánansajis bivnnuhis turistabáikkiin láve moivi geasset. Nu lávii ovdal koronadili. Smávva roavččit gal sáhttet šaddat, dadjá Clementz.
Dálki mii mearrida
– Bivnnuhis vuojadanbáikkit ja gáttit leat dego magnehtat beaivvádahkan, dál go geasseniehku Spánia, Hellas dahje Tyrkia gáttiin cuovkanii, oaivvilda Clementz.
Jus šaddá ránes, váivves arvedálki, de sáhttá parkerenmoivi eará sajiin:
– Dakkár beivviid válljejit olbmot mátkkoštit stuorra stohpogálvogávppiide, áinnas vel gálvojorriin. Riska smávva rovččiide stuorru doppe gos párkerensajit leat dievva, dadjá Clementz.
