Ealáhus- ja guolástusdepartemeanta lea čielggadan makkár bargiin leat áibbas dárbbašlaš servvodatdoaimmat borramuš- ja boaldámušváráiduhttimis, ja geat galget oažžut mánáidgárde- ja skuvlasajiid.
– Lea dehálaš ahte bargit geat barget áibbas dárbbašlaš servvodatdoaimmaid, čađahit bargguideaset ovddas guvlui. Sii leat earret eará olbmot geat galget fuolahit ahte rámbuvrrain leat doarvái dárbbašlaš gálvvut. Mii fertet láhčit dili vai dat olbmot sáhttet doaimmahit bargguideaset. Dás lea sáhka dárbbašlaš váráiduhttinsihkarvuođas, dadjá ealáhusministtar Iselin Nybø preassadieđáhusas.
Departemeanta lea árvvoštallan makkár bargit boaldámuš- ja borramušváráiduhttimis leat servodat-dehálaččat, ja geat de ožžot mánáidgárde- ja skuvlafálaldaga iežaset mánáide.
Dušše áibbas dárbbašlaš bargit
Fálaldat lea dušše sidjiide geain leat áibbas dárbbašlaš virggit dan dilis mas Norga lea dál. Guoskevaš doaimmahagat fertejit ieža čielggadit geaidda dat gullá, ja čájehit ipmárdusa iežaset árvvoštallamis. Jus nubbi váhnen sáhttá váldit vára mánás, de galgá mánná leat ruovttus. Olbmot geat eai leat máná váhnemat ja leat riskajoavkkus, eai galgga leat mánnabiiggát.
Dáin bargiin leat áibbas dárbbašlaš barggut
Šibitdoaktárat geat barget šibihiiguin, guolásteamis ja mearradoalus
Bargit geat leat biebmogálvoindustriijas
Rámbuvra- ja bensinstašuvdnabargit
Olbmot geat barget šibitbuvttadeamis, guolásteamis ja mearradoalus
Fuođđarindustriija bargit
Bargit geat barget guovddáš administratiiva doaimmaid
Boaldámušterminálabargit
Bargit distribunálain ja vuorkkáin
Vuorkábargit
Vuoddjit
– Doarvái borramuš buohkaide
Ealáhus- ja guolástusdepartemeanta oažžu eambbo gažaldagaid borramušváráiduhttimis maŋŋel go ráđđehus duorastaga almmuhii ođđa doaibmabijuid bissehan dihte koronavirusa. Ealáhusministaris lea ovddasvástádus ahte Norggas lea doarvái borramuš buohkaide ja son sihtá ge olbmuid gávppašit nu go dábálaččat dahket.
– Vaikko muhtimat vásihit ahte hildut rámbuvrras leat guorránan, de lea mis doarvái borramuš buohkaide. Dađistaga bohtet maid eambbo gálvvut vuorkkáide, dadjá Nybø.
Son ávžžuha álbmoga gávppašit nu go dábálaččat ja jurddašit nubbi nuppi birra boahttevaš beivviid ja vahkkuid.
– Mii fertet muitit sin maid geain ii leat vejolašvuohta gávppašit gasku beaivvi ja sin geain ii leat vejolašvuohta gávppašit hui ollu. Jus mii ain áberávkkostit, de dat čuohcá daidda servodagas geain lea heajumus dilli. Jus buohkat baicca gávppašit dábálaččat, de manná dat hui bures, dadjá Nybø ja muittuha maid dan seammás ahte lea bahá ahte dávda njoammu jus dahje go ollu olbmot čoahkkanit ráidui rámbuvrras.
