-Almmuhus-
OĐĐASATČuoččuha vásihan vealaheami čoahkkimis kvena historjjá birra

Čuoččuha vásihan vealaheami čoahkkimis kvena historjjá birra

-

-

Maŋŋebárgga lei Tufsingdalas Trøndelágas čoahkkin man Trøndelag Kvensk Finsk searvi lágidii. Maŋŋel čoahkkima čuoččuhuvvo dáhpáhuvvan vealaheapmi sámediggeáirasa vuostá.

– Lean sámediggeáirras nu ahte dakkár politihkalaš čoahkkimat ja sátnevuorut leat miellagiddevaččat munnje. Lean maid sámesearvvi ovddas dáppe ja mis lea lagas ovttasbargu Norgga Kvenaid servviin, nu ahte lei miellagiddevaš mannat gullat eará searvvi mii fátmmasta kvenaid. Dat leat guokte organisašuvnna, muitala Kristin Sara, Norgga Sámiid Riikkasearvvi sámediggeáirras Lulli-Sámi válgabiirres.

Čoahkkima fáddá lei kvenaid historjá ja struktuvrralaš rasisma mii lassána Norggas dál. Čoahkkimis lei maid báikkálaš gáicaboanda gii muitalii mo boazodoallu billista su ovddas boandan, ja ahte son ferte heaittihit doalu dan dihtii.

Gohčoduvvon jallan

– Maŋŋel čoahkkima lei okta Trøndelag Kvensk Finsk searvvis sakka suhttan ja bođii mu lusa ja sivahalai ahte mun bealuštan boazodoalu. Dasa dadjen juo, muhto bealuštan maiddái eanadoalu. Dalle bođii gitta ámadaju lusa ja dáhtui mu mannat bohccuid fáktet. Dadjen ahte orun mearragáttis inge leat oassin boazodoalus, dalle čeargugođii ja gohčodii mu jallan, muitala Sara.

Dan maŋŋel muitala Sara ahte nubbi olmmoš lei šaddan fysalaš su vuostá, ja galgá hoigadan su.

– De bođii čoahkkinjođiheaddji ieš ja gohčodii mu gielisin, jallan, bitchan ja rasistan. Son čearggui munnje ja oaivvildii ahte geahččalin čiegadit ahte lean NSR-politihkkár. Jerren manin dan smiehttá, ja son cuigii ovtta bollui mii mus lea jáhkas mas čuožžu NSR ja oaivvildii ahte lea almmostahttán mu. Dalle dadjen ahte jos livččen áigon čiegadit ahte lean NSR:s, de livččen váldán boalu eret, dadjá Sara.

Áigu ságastallat politijaiguin

– Mun háliidan ságastallat politiijaiguin nu ahte registrerejit dan, ja dan lea dehálaš go lean áirrasdoaimmas. Lea maid dehálaš ahte PST duođašta váttisvuođaid maid politihkkárat vásihit, dadjá Sara.

Son dadjá ahte lea dohkálaš jos ii leat ovttaoaivilis soames áššis, muhto ii leat dohkálaš láhttenvuohki leat suhtus ja guhkkin eret láhttet fysalaččat.

– Dat lea juoidá maid mii politihkkárat vásihat, iige nu sáhte leat. Ii galgga vásihit cielaheami ja vealaheami min suorggis politihkkárin. Go lea álbmotválljejuvvon, de ii galgga gierdat vealahuvvot ja cielahuvvot dan láhkai, ii sáhte leat nu min politihkalaš digaštallanbirrasis, dadjá Sara.

Prográmma historjjá ja rasismma birra

– Prográmma lei historjjá ja struktuvrralaš rasismma birra, mii lassána Norggas dál. Visot čuožžu bovdehusas. Dán ášši mii ovddidit ollislaččat duohtavuođakommišuvdnii, dadjá Trøndelag Kvensk Finsk searvvi jođiheaddji Vegard Whittington Tengelsen SMS bokte Ávvirii.

Ávvir lea ovddidan buot čuoččuhusaid maid Kristin Sara lea muitalan, muhto Tengelsen ii kommentere daid.

-Almmuhus-