Odne hástaluvvojit buohkat coggat spábbačiekčanbáiddi doarjundihte rahčama mánáidborasdávdda vuostá.
– Mii bargat buohkat ovttas mánáidborasdávdda vuostá, dadjá Mánáidborasdávdasearvvi generálačálli Trine Nicolaysen preassadieđáhusas.
Bearjadaga, miessemánu 5. beaivvi, hástaluvvojit ealáhuseallin, politihkkárat, skuvllat ja priváhtaolbmot, buohkaid geat juo sáhttet, coggat spábbačiekčanbáiddi, vippset doarjaga mánáidborasdávdadutkamii, ja juohkit govaid sosiála mediain.
– Govdodat ja rekrutteren lea mearrideaddji oažžut bohtosiid, sihke spábbačiekčamis muhto maid rahčamis mánáidborasdávdda vuostá, joatká Nicolaysen.
– Dán jagi mii leat ožžon vel Arne Scheie ja Truls Svendsena fárrui dán spábbačiekčanbáidebearjadahkii.
Seamma joavkkus
Muhtumat dán jagáš Spábbačiekčanbáidebearjadaga oassálastiin leat Norgga stuorámus fitnodagaid searvvis nu go Norgga spábbačiekčanlihttu, Elkjøp, Jysk, XXL, Lenovo, Superoffice, DnB ja Komplett. Diibmá serve 19 000 ovttaskasolbmo kampánjii mii čokkii badjel 2,3 miljovnna ruvnno mánáidborasdávdaáššái, ja generálačálli lea speanta dán jagáš bohtosiin.
– Mii njuorrasit vel go oaidnit man oallugat servet dán borasdávdaáššái, ja sávvat ahte šaddá erenoamáš fiinna ja mearkkašahtti beaivi, dadjá Nicolaysen.
Váibmu Brannas
Borasdávda lea dábáleamos sivva man dihte mánát gaskal 1 ja 14 jagi jápmet Norggas. Mánáidborasdávdasearvvi mihttu lea ahte ii oktage mánná galgga jápmit borasdávddain, ja Spábbačiekčanbáidebearjadaga ruđat mannet hui dehálaš dutkamii. Mánáidborasdávdasearvi bargá maid dainna ahte čuvget mánáid dili geain lea borasdávda ja sin bearrašiid lossa dilis. Nu go dalle go Jesper Lilleskare (6) beasai maskohtan Brann stádionis cuoŋománu, dušše jagi maŋŋel go su váibmu bisánii lymfaborasdávdda geažil.
Jesper lea ain divššus boahtte jagi njukčamánu rádjái, iige danne beasa leat nu aktiiva spábbačiekčanšiljus go háliidivččii. Brann stádionis oaččui son niehkobeaivvi, ovttas Brann kapteainnain Sivert Heltne Nilseniin.
– Beroškeahttá makkár joavku lea du váimmu lagamusas, de mii dárbbašit du doarjaga Spábbačiekčanbáidebearjadaga, dadjá Nicolaysen.
– Mánát nu go Jesper galget ain olu vásihit. Ovttas mii sáhttit beassat lagabui mihtu ahte ii oktage mánná galgga jápmit borasdávddain!
Ná sáhtát veahkehit:
1. Vippse 50 ruvnno, dahje nu olu go ieš háliidat, nummárii 705404, ja de leat searvvis!
2. Cokka spábbačiekčanbáiddi miessemánu 5. beaivvi – bargui, skuvlii, mánáidgárdái dahje ruovttus.
3. Juoge gova iežat SpábbačiekčanbáideBearjadagas ja gilkorastte #fotballtrøyefredag ja #barnekreftforeningen sosiála median.
