Juohke nuppi beaivvi oažžu okta mánná Norggas borasdávdda, ja borasdávda lea ain okta dain dábáleamos jápminsivain mánáin gaskal 1-14 jagi.
Mánáidborasdávddasearvi áigu miehtá čakčamánu čalmmustahttit mánáidborasdávdda ja movt dát čuohcá mánáide ja bearrašiidda geaidda dát guoská. Ulbmil lea maiddái čoaggit ruđa searvvi bargguide ja čalmmustahttit makkár hástalusat mánáidborasdávdda oktavuođas leat.
30 miljovnna dutkamii
Nu movt lávejit, de maiddái dán jagi juolluda Mánáidborasdávddasearvi ruđa dutkamii. Dán jagi addá searvi 30 miljovnna ruvnno mánáidborasdávdadutkamii.
– Mánát dárbbašit alcceseaset heivehuvvon dálkkodeami. Mánáidborasdávda čuohcá olles bearrašii, ja danne ferte obbalaččat geahččat dan. Mánáin lea maid stuorát riska oažžut čuozahusaid maŋit áigái mainna fertejit eallit, danne lea dehálaš ahte dutkojuvvo eambbo mánáidborasdávdda birra, dadjá Mánáidborasdávddasearvvi beaivválaš jođiheaddji Trine Nicolaysen preassadieđáhusas.
