20 proseantta vuođđoskuvlla ohppiin ii leat leairaskuvlaoahpahusfálaldat. Dál áigu ráđđehus geatnegahttit suohkaniid fállat leairaskuvlaoahpahusa dahje eará skuvlaidjadanmátkki oassin vuođđoskuvlaoahpahusas.
– Mii fertet sihkkarastit ahte oahppit besset vuolgit skuvlamátkái vuođđoskuvllas, beroškeahttá gos sii orrot ja mo váhnemiid ekonomiija lea, dadjá oahppo- ja integrerenministtar Jan Tore Sanner preassadieđáhusas.
Dál leat skuvlaeaiggádat mat mearridit fállet go sii leairaskuvlaoahpahusa dahje eará skuvlamátkki ohppiide. Birrasii 80 proseantta ohppiin lea dat fálaldat.
– Muhtun suohkanat biehttalit máksimis diekkár mátkki ohppiide ja dáhttot ohppiid ja váhnemiid ieža ruhtadit tuvrra loaddavuovdimiin, skeaŋkkaiguin ja eará eaktodáhtolaš bargguin. Dan eat mii hálit. Dat lea nuvttáprinsihppa skuvllas, dadjá Sanner.
Skuvllat galget ieža sáhttit mearridit mo mátki galgá organiserejuvvot. Mátki galgá plánejuvvot ovttasráđiid ohppiiguin ja váhnemiiguin, ja ohppiid iešguđet dárbbut galget váldot vuhtii.
Gáibádusat mátkái:
– Unnimusat golbma ija.
– Okta oassi aktivitehtain mátkkis galgá leat oahpahus.
– Oahpahus tuvrras galgá leat sullii seamma go mii skuvllas livččii.
– Mátki galgá leat nuvttá.
– Fálaldat galgá buohkaide boahtit buorrin.
