75 proseantta mánáidgárddiin leat doarvái bargit ja badjel bealis leat doarvái pedagogat.
75 proseantta mánáidgárddiin leat doarvái bargit ja badjel bealis leat doarvái pedagogat.
Mannan čavčča čavgejedje Norgga mánáidgárddiid bargoveahkagáibádusaid.
Mánáidgárddiin galgá unnimusat okta bargi golmma mánnái geat leat vuollel 3 jagi boarrásat, ovtta mánáidgárdeoahpaheaddjis fas galgá ovddasvástádus eanemusat čieža mánnái dán ahkeluohkás.
Boarráset mánáid searvvis galgá okta bargi guđa máná nammii ja unnimusat okta mánáidgárdeoahpaheaddji 14 mánnái.
Lassánan sakka
Mánáidgárdebargit leat lassánan sakka 2017 rájes 2018 rádjai, čájehit oahpahusdirektoráhta logut.
75 proseantta mánáidgárddiin leat dan mađe olu bargit ahte juohkehaččas lea ovddasvástádus eanemusat guđa mánnái.
Ovdal go dát gáibádus ilmmai, de ledje badjel bealis seamma olu bargit juohke máná nammii.
– Dáinna leat hirbmat duhtavaččat ja dát duođašta ahte dán politihkas lea ávki. Lassi ollesolbmuin addit buoret fálaldaga mánáidgárdemánáide. Bearráigeahčču buorrána ja mánáide láhččojuvvojit buoret eavttut sihke stoahkama ja ovdáneami ektui. Dattetge eat leat vel olahan buot mihtuid, ja danin fertejit sihke gieldda ja priváhta mánáidgárddit virgádit vel eanet bargiid, dadjá oahpahusministtar Jan Tore Sanner preassadieđáhusas.
Dárbu eanet pedagogaide
Mánáidgárddit leat virgádan eambbo pedagogaid 2017 rájes, muhto lea dárbbašlaš vel eambbo mánáidgárdeoahpaheddjiide.
– 2017 rájes leat ásahuvvon masá 3400 pedagogalaš jođiheaddji virggi Norgga mánáidgárddiin ja diibmá ohce hirbmat oallugat mánáidgárdeoahpaheaddji ohppui. Dát dieđusge nanne mánáidgárddiid kvalitehta, lohká Sanner.
Dássážii devdet 53 proseantta Norgga mánáidgárddiin pedagogagáibádusaid dispensašuvnna haga.
