Sámediggeráđđi lea juolludan 300 000 ruvnno Julevsámi mánáidgárdái Viejegii, prošektii «Generasjonsfelleskap for tradisjonelt arbeid» (Buolvvaid searvevuohta árbevirolaš bargguin).
– Dán prošeavtta vuolggasadjin lea sámi árbevierru, gos mánáid bajásgesset olles bearaš, sohka, siida ja báikkálaš servodat. Das čatnasit sihke mánát ja boarráset buolva lagas oktavuođaide, ja julevsámi giella, kultuvra, árbevierut ja árvvut leat guovddážis prošeavttas. Dát lea duođai buorre prošeakta mas barget sihke árbedieđuin ja giela nannemiin, dadjá sámediggepresideanta Silje Karine Muotka (NSR) preassadieđáhusastis. Doarjja lea juolluduvvon ortnega «Doarjja prošeavttaide ja ovddidanbargguide mánáidgárddiin» bokte. Ulbmil dainna ortnegiin lea ahte mánáidgárddit galget oažžut buoret kvalitehta sámi giella- ja kulturbargui.
Áigot ásahit sohkabuolvasearvevuođa
Prošeakta, man mánáidgárdi Viejega galgá čađahit, galgá nannet árbevirolaš barggu ja máhttofievrrideami buolvvaid gaskkas. Dan sii galget dahkat dakko bokte ahte mánáidgárdi ásaha sohkabuolvasearvevuođa gos boarráset Julevsámi resursaolbmot árbevirolaččat barget ovttas mánáidgárddiin. Prošeakta galgá maiddái nannet mánáidgárdemánáid julevsámegiela.
Mánát galget ráhkkanit birget bures, šaddat oadjebassan ja oažžut buori gullevašvuođa iežaset kultuvrii, gillii ja nannet iežaset julevsámi identitehta. Boarráset buolva guoddá sámiid oktasaš historjjá ja máhtu, ja dakkár oktavuohta dagaha ahte árbevirolaš máhttu ja árbevierut sirdašuvvet nuorat buolvvaide. Prošeakta galgá maid veahkehit mánáid oahppat julevsámegiel sániid ja dadjanvugiid barggu oktavuođas, ja dieinna lágiin oažžut rikkis ja girjás julevsámegiel fálaldaga.
– Mii Sámediggeráđis sávvat lihku Viejega mánáidgárdái ja resursaolbmuide ásaheamis sohkabuolvasearvevuođa mas lea ávki boahtteáigái, loahpaha sámediggepresideanta Muotka.
