Stuorát oassi ohppiin ohcet fitnofágii, eambbosat ožžot oahpposaji ja eambbosat čađahit ja nagodit fágareivve.
Vássán jagi loahpas ledje 74 proseantta ohcciin ožžon dohkkehuvvon oahpposoahpamuša riikadásis.
Dat lea stuorámus oassi mii lea registrerejuvvon dan rájes go mihtidišgohte 2011:s. Finnmárkkus lea 78 proseantta dain geat ohce oahpposaji, ožžon dan.
– Mađi eambbo oahpposajit, dađi eambbosat čađahit oahpuset. Dál lea njealját jahki go čeahpes oahppit geain lea bargomiella, ožžot oahpposaji, muhto liikká eat leat vel moalas. Ráđđehus áigu joatkit ovttasbarggu ealáhusdoaimmain ja fylkkagielddain vai vel eambbosiidda juollu oahpposadji, dadjá oahppo- ja integrerenministtar, Jan Tore Sanner preassadieđáhusas.
Lassáneapmi miehtá riikka
Lassáneapmi lea miehtá riikka, muhto lea stuora erohus fylkkaid gaskka man stuora proseantaoassi ohcciin ožžot oahpposaji.
Riikadásis leat badjel 29 200 ohcan oahpposaji, 21 706 dain leat ožžon dohkkehuvvot.
Dat lea measta 900 eambbo go 2017:s.
– Finnmárku ovdána buori guvlui. Aust-Agderis, Telemárkkus ja Sogn ja Fjordanes lea leamaš lassáneapmi 10 proseanttain buohtastahttojuvvon 2015:in, ja Romssas, Finnmárkkus, Nordlánddas ja Hedemárkkus čájehuvvo maid ahte eambbo ohccit ožžot oahpposaji. Dat čájeha ahte sihke fitnodagat ja almmolaš sektor váldet ovddasvástádusa, dadjá Sanner.
