-Almmuhus-
-Almmuhus-
OĐĐASAT– Buoremus lea go Skjerve šaddá readdju borrat

– Buoremus lea go Skjerve šaddá readdju borrat

Journalista

-

-

Hirbmat leahtuin bođii ruoŧalaš Petter Karlsson mollii ja válddii golli dán jagáš FL-1000 gilvvuin.

 – Áibbas jáhkkemeahttun! Lean rahčan dán ovddas olu, olu jagiid. In leat jáhkkán mun vuoittán vel dán jagi, dajai Petter Karlsson (40) go bođii mollii iežas guđain beatnagiin ja ovttain vel mii lei reagas.

Vuoitodovdu Njeavdámis juo

Máŋgačuođi olbmo ledje boahtán Álttá guovddážii váldit vuostá dán jagáš FL-1000 vuoiti odne diibmu 11:51.

(GEAHČA VIDEO DÁS VUOLLELIS)

Son lei goalmmes searvan dáidda gilvvuide. Diibmá bođii 7. sadjái ja ovddit jagi 16. seamma 1000 km-guhkkodagas.


BRUM BRUM! Dán birra lean jurddašan olu, mieđihii vuoiti Petter Karlsson. Govven Marit Elin Kemi. 

 Vuoitu lea Polaris njealljejuvllat  110 000 ruvdnui, 70 duhát Norgga ruvnno ja vel eará vuoittut.

  – Muhto buoremus lea go Skjerve dál šaddá readdju borrat, leaikkastallá son ja čilge ahte su gilvaleaddji Arnt- Olav Skjerve lea stuora njálmmiin dadjalan moadde jagi áigi son borrá iežas readdju jus ruoŧalaš vuoitá goassege, dajai Karlsson.

 – Dovden ahte mus lei gievrras beanaráidu juo dan 16-diibmosaš bottus Njeavdámis, muhto ii ná guhkes gilvvuid dieđe ovdagihtii, sáhttá ollu ain mannat boastut jus mat álgá doapmat bearehaga ja nu billista visot. In lean gal sihkar ovdal dás vudjen Allaskuvlla meaddel mun lean vuoitán

Petter Karlsson

Viimmat lihkustuvai njunušbeatnagiin

Petter Karlsson boahtá Slussforsas Luspie suohkanis Västerbottenis, ja son lea vuosttaš olgoriikkalaš gii 22 jahkái lea vuoitán FL- 1000 km. Leat su iežas beatnagat maid ieš lea hárjehallan.

 – Eanas dáiguin beatnagiiguin lean vuodján olu jagiid. Muhto mus leat álo leamaš váttisvuođat njunušbeatnagiin. Dál ledje vehá seammá bárttit, muhto Kokos, mii lea mu njunušbeana leamaš guhká, čájehii dál albma fámuid, dajai son. Karlsson lohká gáhtan go ii guođđán Piko nammasaš beatnaga Jotkii, go šattai geasehit dan 30 kilosaš beatnaga reagas.

 

Garra leahttu

Sus lei garra ja dássedis leahttu olles ija maŋŋel go vuoddjái Kárášjogas diibmu 01:02. Kárášjogas son bisánii vuoiŋŋastit vihtta diimmu, mii lea measta diimmu guhkit go njuolggadusaid mielde lei bággu.

Čieža diimmu maŋŋel go vulggii Kárášjogas, badjelaš gávccis iđđes, vujii son Joatkka meaddel, ja Finnmarksløpet ekspearta Trond Ørslien dajai sin neahttasiiddus ahte nu jođánit ii leat oktage vel bisánasten ja dollen viidáseappot.

 

Sihkarastii vuoittu Sirpmás

Karlsson lea leamaš njunnošiid gaskkas čađat, muhto eai navdán álggos gal su vuoitit gilvvuid. Son lei viđadin Jotkii go vuoddjáje ja lei goalmmádin Njeavdán 1:žii. Muhto son ii bisánan Sirpmás, ja doaladii leahtuin meaddel. Dainna lágiin sihkkarastii son de juo vuoittu.  Álgovahkus go FL-500 beanaráiddut vudje, lei lossa siivu ja luotkko muohta. Muhto FL-1000 vuddjiide šattai buoret siivu go bivaldii vehá ja fas galbmii.

 

Nubbin bođii Marit Beate Kasin Valdresas eret,  diimmu ja 16 minuvtta maŋŋel gollevuoiti. Ja go vuosttaš saji vuoiti lea ruoŧalaš, de Kasin vuittii dán jagáš Norggameasttirgilvvuid dán guhkesgaskka beanavuodjima.

Kasin lea unnivuođa rájes vuodján beatnagiiguin.  Son fertii leat Kárášjogas vihtta diimmu, badjel diimmu maŋŋelii go Karlsson, ja son vuoddjái dakkaviđe maŋŋel bákkolaš bottu, diibmu 02:23.. 

Goalmmádin FL1000-gilvvus bođii Arnt Ola Skjerve, 42 minuvtta maŋŋel silbba. Son vuittii de nuppi saji Norggameasttirgilvvus.  

 

 

-Almmuhus-