FL-1000 gilvaleaddji Petter Karlsson lea dál jođus Kárášjohkii, ja lea vuordimis joavdat Kárášjoga dárkkistanbáikái váile beallogis odne eahkes.
FL-1000 gilvaleaddji Petter Karlsson lea dál jođus Kárášjohkii, ja lea vuordimis joavdat Kárášjoga dárkkistanbáikái váile beallogis odne eahkes.
Finnmarksløpet FL-1000 vuoddji, ruoŧŧelaš Petter Karlsson, lea vuoddján Leavvajogas, ja lea dál jođus Kárášjohkii gávcciin beatnagiin. Son lea diktán beatnagiid vuoiŋŋastit guhtta diimmu Leavvajogas, ja sávvamis lea ieš maid ollen veaháš vuoiŋŋastit, čállá Finnmarkløpet. Leavvajogas Kárášjohkii lea 85 kilomehtera mii lea sihke gáibidahtti ja lossa mátki.
– Lean hui gearggus mátkái, in ge bala nu Kasinis ja Frydenlundas, muhto Arnt Ola Skjerves, geas leat ain 13 dearvvaš beatnaga, balan veaháš, logai Petter Karlsson Finnmarksløpii ovdal go vuoddjái Leavvajogas.
Marit Beate Kasin ja Ronny Frydenlund bođiiga Leavvajohkii oktan nuppi ja goalmmát sajis. Arnt Ola Skjerve joavddai njealjádin.
Govven: Davian Müller
Vuoiŋŋasta unnimusat njeallje diimmu Kárášjogas
Buot beanavuoddjit galget vuoiŋŋastit logi diimmu, muhto sáhttet juohkit áiggi gaskal Leavvajoga ja Kárášjoga dárkkistanbáikkiid. Karlssonis leat dál báhcán njealljr diimmu maid ferte váldit Kárášjogas. Vuddjiin lea dieđusge vejolaš vuoiŋŋastit eambbo, muhto logi diimmu vuoiŋŋastanáiggi leat lágideaddjit gáibidan.
Ávžžuha olbmuid boahtit
Kárášjoga Scandic hotealla direktevra John Arne Mathisen ávžžuha kárášjohkalaččaid boahtit Sápmi parkii ja váldit vuostá beanavuddjiid mat lea vurdon otná eahkeda mielde.
– Dá lea ja leamašan álbmotfeasta, ja sávan olbmot bohtet ja jus ii leat vejolašvuohta boahtit Sápmi Parkii, de ávžžuhan olbmuid čuožžot luoddaguoras, lohká son. Odne lea NRK:s njuolgasátta Kárášjogas, masa Mathisen lohká illudit.
– Mii beassat márkanfievrridit Kárášjoga, ja dat mearkkaša hui ollu, lohká hotealladirektevra gealdduin, guhte illuda go Kárášjohka lea beassan leat dárkkistanbáikin sihke FL-500 ja FL-1000 gilvvus.
