– Erenomáš somá čuojahit Kárášjogas

Finnmarksløpet beanagilvvu oktavuođas johtá Scene Finnmark lávddiin, ja ikte ledje Kárášjogas stuorra illun kárášjohkalaččaide. Lagabui 300 olbmo ledje boahtán Sápmi Parka olggobeallái vásihit Finnmarksløpet siidda ja liveshow. ráisalačča Ágy (Agnete Båtnes Bråten), guhte lea nubbi dan guovtti váldoartisttas, mielas leamašan hui somás turnea, ja lasiha hui jođánit ahte Kárášjogas ledje erenomáš ollosat.

– Juohke báikkis leamašan álbmotfeasta, muhto ii leat eahpádusa ahte Kárášjogas ledje eanemus olbmot. Lei hui somá čuojahit dáppe ja duođas sukseassa. Lea nu go mun ovdal lean dadjan; Kárášjohka lea measta mu ruovttobáiki, lohká Ágy maŋŋá konseartta.

Somás vásáhus

Son muitala Finnmarksløpet leamašan somás vásáhus, ja juohke báikkis lea ollu olbmot ja buorre mokta.

– Leat issoras stuorra doalut, leamašan somás vásáhus, lohká duđavaš artista. Nubbi váldoartista Scene Finnmark lávddis dán jagi lei Ivvár.

Galmmas

Kárášjoga báikkálaš artistta Lásse Ánte Gaino Gaup mielas lei somá, muhto veaháš galmmas. Kárášjogas lei 10 buolašceahki gaskavahku eahket.

– Dá lea mu galbmaseamos konsearta dán rádjái, muhto lei hui somá go ollu olbmot ledje boahtán. Lei hui buorre, lohká Gaup.

Beatles lávlagiid čuojahii

Gaup lea Beatles čuovvuleadji ja nu besse kárášjohkalaččat gullat Beatles joavkku lávlagiid.

– Beatles lea mii lea ožžon mu čuojahišgoahtit, ja čuojahan sin lávlagiid ja maiddái iežan lávlagiid, lohká Lásse Ánte Gaino Gaup. Muđuid ledje báikkálaš artisttat juoigi John Mathis Utsi, Elin Kåven ja Eva Jeanette Iversen.

Rámida mánáid

Finnmarksløpet siida čájehii maŋŋá čájálmasa beanavuoddji «Balto» birra. Neavttár Alexander Rindestu maid rámida Kárášjoga ja lohká somán guoimmuhit go mánát čájehit nu stuorra beroštumi.

– Leamašan hui somá johtit čájálmasain. Kárášjogas lei erenomáš somá neaktit, go mánát čájehedje ilu ja beroštumi, lohká «Balto» neavttár Alexander Rindestu.