Mánáid-, nuoraid- ja bearašdirektoráhtta, Bufdir, háliida ollásit bissehit adopšuvnnaid olgoriikkas guovtti jahkái.
Dan dieđiha VG. Direktoráhtta háliida bissehit adopšuvnnaid dassážii go adopšuvnnat leat dárkilit guorahallojuvvon.
– Mii árvvoštallat lobihisvuođariskka leat duohtan, ja ahte dat lea dakkár dásis ahte mii rávvet bissehit doaimma dassážii go lávdegoddi geige raporttastis ja buktá rávvagiid dasa movt vejolaš boahttevaš adopšuvdnavuogádat berrešii leat, dadjá Bufdir-direktevra Hege Nilssen.
Mánáid- ja bearašdepartemeanta dat mearrida galget go sii čuovvut rávvaga.
Mánáid- ja bearašdepartemeanta muitala ahte sii leat ožžon rávvaga, muhto ahte sii oaivvildit ahte lea dárbu eanet čielggadit fáktadieđuid ja rievttálaš gažaldagaid.
– Departemeanta lea bivdán Bufdir buktit eanet guorahallama nu jođánit go vejolaš, dadjá Mánáid- ja bearašministtar Kjersti Toppe (Gb).
