Mannan mánus geigejuvvui mánáid- ja bearašministarii raporta mánáid birra geafes bearrašiin.
Áššedovdijoavku mánáid dili birra geafes bearrašiin ovddidii iežas čielggadeami mánáid- ja bearašministarii golggotmánu 17. beaivvi. Raporttas bohtet ovdan sin rávvagat dasa movt nannet mánáid dili geat bajásšaddet geafes bearrašiin ja movt eastadit geafivuođa čuovvumis boahtte bulvii.
– Mánát eai galgga Norggas dárbbašit bajásšaddat geafivuođas. Ráđđehus vuoruha bargat dan ovdii ahte unnidit erohusaid ja eastadit geafivuođa. Dat lea dehálaš sihke mánáide ja bearrašiidda, ja servodahkii, lohká mánáid- ja bearašministtar Kjersti Toppe (Gb) preassadieđáhusastis.
Raporttas boahtá ovdán ahte Norggas ellet 11 proseantta buot mánáin geafivuođas. Ollislaš raportta sáhtát lohkat ráđđehusa neahttasiiddus.
Lassána
Dál bargojuvvo olu eastadit geafivuođa mánnábearrašiin ja unnidit daid negatiiva váikkuhusaid maid bajásšaddan geafivuođas mielddisbuktá. Riikkaidgaskasaš dili ektui leat Norggas unnán mánát geat ellet bearrašiin main lea bistevaččat unnán sisaboahtu, muhto dilli lea guhká mannan boasttuguvlui.
– Vaikko mii leat nannen bálvalusfálaldagaid mánáid ja nuoraid guovdu, de fertet mii duođas váldit dan ahte bearrašiid lohku, main lea unnán sisaboahtu lea lassánan. Danne nammadii Støre ráđđehus borgemánus 2022 áššedovdijoavkku guorahallat mánáid dili geafes bearrašiin, dadjá Toppe.
Stuoradiggedieđáhus
Raporta sáddejuvvo gulaskuddamii, ja 2025:s ovddida ráđđehus stuoradiggedieđáhusa sosiála dássema ja sosiála mobilitehta birra. Dán oktavuođas ovttasbarget máŋga departemeantta áššesurggiid rastá, buoridan dihte mánáid ja nuoraid dilálašvuođaid.
– Mii fertet vuoruhit daid doaibmabijuid main lea buoremus ávki. Mun áiggun dárkilit guorahallat áššedovdi joavkku árvvoštallamiid ja rávvagiid, ja giittán joavkku barggu ovddas dán hui dehálaš áššis, lohká Toppe.
.
