Dutkit barget loddeinflueansaboahkuin go ballet ahte sáhttá njoammut olbmuide. Čakčamánus ožžot olbmot Oslos vuosttaš boahkuid.
Loddeinflueansa njoammu miehtá máilmmi. Norggas lea njommon miehtá Norgga rittu, muhto erenomážit Čáhcesullos ja Nuorta-Finnmárkkus. Dušše Čáhcesullo gielddas leat čohkken birrasii 10 000 jápmán skierru.
Norggas lea njommon lottiide ja muhtin njiččehasaide, ja go ballet ahte boahtteáiggis sáhttá njoammut olbmuide, de ráhkadit boahkuid dan vuostá, čállá Aftenposten.
Oslo universitehta boahkuha vuosttaš eaktodáhtolaččaid čakčamánus.
Dutkit máŋggaid riikkain leat bargamin ráhkadit dákkár boahkuid. Mihttu lea ráhkadit boahku mii sáhttá geavahuvvot pandemalaš influeanssaid vuostá.
– Go boahkku lea addojuvvon olbmuide ja iskkaduvvon klinihkalaččat, de sáhttá moatti mánus gárvánit boahkku mii sáhttá geavahuvvon pandemalaš influeanssaid vuostá, dadjá boahkkodutki ja immunologa Gunnveig Grødeland, gii jođiha dán barggu.
(©NTB)
