– Lea áibbas dárbbašlaš eastadit čalbmevahágiid, lohká lihttu jođiheaddji Terje André Olsen.
Blindeforbundet lea vuorjašuvvan go nu olusiid čalmmit vahágahttojuvvojit juohke jagi dollarusonbáhčima geažil. Lihttu gáibida ahte ii galgga priváhta olbmuin lohpi šat cahkkehit dollarusona dahje rakeahta. Dan mearridii Blindeforbundet (čalmmehisolbmuid lihtu) riikkčoahkkin gieskat Hurdal báikkis.
Suodjalančalbmeklásat eai leat doarvái
Maŋimuš logi jagis leat badjel 100 olbmo bártidan dollarusona geažil. Vaikko lea ávžžuhan olbmuid geavahit suodjalančalbmeklásaid, de dattege vahágahttet dat olbmuid čalmmiid, lohká Blindeforbundet jođiheaddji Terje André Olsen.
Iskkadeamis, man Blindeforbundet lihttu čađahii diibmá, bođii ovdan ahte okta juohke viđat olmmoš ii geavahan suodjalančalbmeklásaid go cahkkehii rakeahta. Ođđajageruohta 2021 vahágahtte 10 olbmo iežaset čalmmiid.
Olusat háliidit gildosa
Seamma iskkadeamis vástidedje 44 proseantta álbmogis ahte ii galggašii lohpi vuovdit dollarusoniid priváhta olbmuide. Juohke njealját olbmo mielas berrešii njuolggadusaid čavget ja vuollel 30 proseantta olbmuin háliidit bisuhit dálá njuolggadusaid. Badjel 60 jagi joavkku olbmot lohket golmmas viđa olbmos ahte ii berre vuovdit dollarusoniid priváhta olbmuide.
