– Lea dárbbašlaš eastadit čalmmiid vahágahttimis, lohká Blindeforbundet jođiheaddji Terje André Olsen. Olu organisašuvnnat, fágaolbmot ja earát dorjot dán evttohusa.
– Blindeforbundet jahkečoahkkin mearridii 2021 čavčča gáibidit ahte priváhta rakeahttabáhčin gildojuvvo oalát. Maŋimuš logi jagi leat badjel 100 olbmo čalmmit skáidnašuvvan dollarusonbáhčima geažil. Vaikko dán áigodagas leat ávžžuhan olbmuid geavahit suodjalančalbmeklásaid, de leat liikká menddo olu čalbmevahágat, lohká Blindeforbundet jođiheaddji Terje André Olsen preassadieđáhusas.
Iskosis maid Ipsos čađahii Blindeforbundet ovddas diibmá, das bođii ovdan ahte okta juohke viđát olbmos ii geavahan suodjalančalbmeklásaid go bážii dollarusoniid dan maŋimuš guovtti jagis. Diimmá jahkemolsumis, ođđajageruohta ja ođđajagebeaivvi 2021, de vahágahtti rakeahttabáhčin logi olbmos čalmmiid. Seamma iskosis lohká 44 proseantta álbmogis ahte berrešii leat gielddus vuovdit dollarusoniid priváhta olbmuide. Juohke njealját olbmo mielas galggašii čavget njuolggadusaid ja vuollel 30 proseantta álbmogis oaivvildit ahte galgá leat nu mo dál lea.
