Biila, man ohcalit dan oktavuođas go Hámmárfeastta bárdni lea dieđhuvvon láhppon, lea filbmejuvvon Háhparánddi duollostašuvnnas odne.
Lea 20 jahkásaš hámmárfeastalaš Espen Giæver Antonsen gii lea dieđhuvvon jávkan, ja gean birra politiijat bivdet eambbo dieđuid. Son lea jávkan oktan biillain, rukses Mazda 626, mas lea šiltanummar ZT31854.
Ii láve jávkat
Antonsen lea leamaš jávkosis diibmu 23.30 rájes ikte. Bearaš ii leat ožžon suinna oktavuođa, ii ge son láve nu jávkat goassege. Danne válde oktavuođa politiijaiguin mánnodat iđida.
Politiijat muitalit Altaposten aviisii ahte lea skihkalaš olmmái gii ii spiehkas dieinna lágiin, ja danne dat jurddaša bearaš mii lea dáhpáhuvvan.
– Dievddu leat maŋemus oaidnán gaskaijaáigge Prærien guovllus Hámmárfeasttas. Biila gullá láhppon olbmo villjii. Bearaš váivašuvvá go eai leat oaidnán su, eai ge dan biilla, muitala operašunjođiheaddji Lars Jørgen Kleven Oarje-Finnmárkku politiijaguovddážis.
Videofilmmas
Politiijat dieđihedje diibmu ovttas odne beaivet ahte biila lea oidnon rádjestašuvnnas Ruoŧá rájis, manname Ruŧŧii.
– Ruoŧa duolloeiseválddit válde minguin oktavuođa, ja dieđihedje ahte biila lea rasttildan Suoma ja Ruoŧa ráji Háhpáránddis diibmu beal oktanuppelogis odne. Eat mii, ii ge bearaš, dieđe manne biila lea doppe oidnon, dadjá operašunjođiheaddji Opdahl Altapostenii ja lohká videobearráigeahččanfilmma sáddejuvvon sidjiide.
Son lohká vuos beare árrat dadjat leago dáhpáhuvvan makkárge vearredahku dán jávkama oktavuođas. Sis eai leat makkárge teoriijat dán áššis. Su telefuvdna lea maid jáddaduvvon.
