Varas iskkadeamis mii lea dahkkon Tryg Forsikring dáhkádusa ovddas, vástida 28 proseantta ahte sii bidjet bivttasgoikadanmašiinna ihkku johtui seastin dihtii ruđaid. – Mii ballat olbmot eai fuolat buollinsihkkarvuođa dálvit, lohká dáhkádusa bargi Torbjørn Brandeggen.
Elrávdnjehaddi lea dávjá hálbbit ihkku ja olusat geahččalit seastit ruđaid go eanaš olbmot ođđet.
– Mii áddet olbmot háliidit seastit elrávnnji dakko gos sáhttet, muhto mii ballat olbmot eai fuolat buollinsihkkarvuođa doarvái, erenoamážit go geavahit bivttasgoikadanmašiinna go buohkat ođđet. Servodatsihkkarvuođa ja gearggusvuođa direktoráhta lea maŋimuš vihtta jagi registreren ahte 35 proseantta stohpobuollimiin vulge bivttasbassanmašiinnas dahje bivttasgoikadanmašiinnas, lohká Tryg Forsikring dáhkádusa gulahallanneavvu Torbjørn Brandeggen preassadieđáhusas.
Maiddái buollinčáskadeaddjit oaivvildit ahte olbmot váldet menddo stuorra riskka seastin dihtii ruđaid go basset biktasiid ihkku, vaikko bures dihtii mii sáhttá geavvat.
– Dát lohku ii hirpmástuhte min. Go elrávdnji lea hálbbimus ihkku ja go neahttaláigomálle ávžžuha geavahit elrávnnji ihkku, de lea dát vuostá buorre buollima eastadeami, lohká Nordhordland ja Gulen gielddaidgaskasaš buollineastadanossodaga bargi Ole Johan Ingebrigtsen.
