Jus dus lea boares batteriija biillas, de ávžžuhuvvo molsut dan.
Tryg Forsikringas lassánedje ođđajagemánu 80 % biilavuoddji geat dárbbahedje veahki oažžut biilla johtui.
– Buolašin rahčet boares batteriijat mat áigá livččii galgan molsojuvvot, dadjá Tryg gulahallanráđđeaddi, Torbjørn Brandeggen preassadieđáhusas.
Erenoamážit buollášeamos áiggi Lulli-Norggas vásihii Tryg ođđajagemánu mearkkašahtti lassáneami diimmá ođđajagemánu ektui.
– Gaskamearálaččat ožžo 170 biilakundara veahki juohke beaivvi ođđajagemánu, geain badjel 30 % ledje váttisvuođat oažžut biilla johtui dahje guoros batteriija. Olu elbiilaeaiggádat eai dieđe ahte elbiila maid dárbbaha dábálaš 12-voltbatteriija, oažžut biilla johtui. Jus dát lea badjel vihtta jagi boaris de dat sáhttá hedjonan nu olu ahte ii šat doaimma buolašin, dadjá son.
Ávžžuhit molsut boares batteriija
Iskkadeamis maid YouGov čađahii Tryg ovddas, vástidii 14 % biilaeaiggádiin ahte sis leat leamaš váttisvuođat oažžut biilla johtui buollaša geažil ođđajagis.
– Jus dus lea váttisvuohta batteriijain mii galgá vuolggahit biilla, dahje lea boarráset go vihtta jagi, de mii ávžžuhit molsut dan, dahje oastit batteriijaláddára. Dakkár ládden sáhttá dagahit ahte dus lea batteriija dievva go de dárbbahat dan, dadjá Brandeggen.
