Ođđa guorahallan čájeha ahte guovttis lohkásis vuollel 30 jagi eai goassege dárkkis doaibmá go suovvanjurggon. – Jus buollá, de lea doaibmi suovvanjurggon olbmo buoremus eallindáhkádus, lohká Tryg gulahallanráđđeaddi Torbjørn Brandeggen.
Dássážii leat dán jagi 23 olbmo jápmán buollimis, čájehit Servodatsihkkarvuođa- ja gearggusvuođadirektoráhta logut.
Fargga rahpasa juovlamánnu goas lea stuorámus buollinvárra.
– Jođánis dieđihemiin lea stuorámus vejolašvuohta beassat olggos viesus mii buollá, ja dalle lea oalle hirpmahuhtti ahte nu oallugat eai oba dieđe ge doaibmá go suovvanjurggon. Dán berrešii iskat mánnosaččat. Bahtterat oainnat eai bistte agibeaivve, ja jus leat manus justa dalle go suovvanjurggon dieđiha ahte báhtterat leat nohkamin, de soaittát dan manahit, lohká Tryg dáhkádusfitnodaga gulahallanráđđeaddi Torbjørn Brandeggen preassadieđáhusas.
Dárkkistit menddo hárve
Guorahallan man YouGov lea čađahan dáhkádusfitnodaga ovddas čájeha ahte čiežas lohkásis vuollel 30 jagi eai láve dárkkistit suovvanjurggona jahkásaččat. 26 proseantta ges vástidedje ahte isket suovvanjurggona juohke nuppi jagi dahje vel hárvvibut.
– Jus gollá badjel guokte jagi ovdal go dárkkistat suovvanjurggona, de gal leat masá eahpeovddasvástideaddji. Suovvanjurggon han dávjjimusat dieđiha jus juoga suovastišgoahtá dahje buollá. Jus leat oađđimin, de han livččii suovvanjurggon sáhttit beastit du ja lagamusaid buollimis, lohká Brandeggen.
Viesus galgá unnimusat okta suovvanjurggon juohke gearddis. Suovvanjurggona berre dárkkistit mánnosaččat ja das berre lonuhit bahtteriid jahkásaččat. Suovvanjurggonis lea maid dehálaš sihkkut gavjjaid vai doaibmá nu go galgá.
Juovlamánu 1. beaivvi lea suovvanjurggonbeaivi ja dalle ávžžuhuvvojit buohkat lonuhit báhtteriid.
