Luopmu ii dárbbaš leat buorre buohkaide. Juohke viđát norgalaš dovdá eanet okto luomus go muđui jagis.
Ođđa oaiviliskkadeapmi beassášluomu oktavuođas, man Opinion čađahii Rukses Ruossa ovddas, čájeha ahte beassášluopmu sáhttá leat váttis áigi ollugiidda.
Guđas logi olbmos vástidit ahte sii leat eanaš ruovttus beassášluomus.
– Ollugat válljejit bissut ruovttus danin go háliidit, muhto máŋgasis ii leat oppanassiige vejolašvuohta dahkat eará go leat ruovttus. Sáhttá šaddat jaskes ja váivves áigi jus ii dovdda iežas oassin makkárge birrasis. Dađi bahábut diehtit mii ahte ollugat dovdet eambbo oktonasvuođa basiid áigge go muđui jagis, lohká Rukses Ruossa presideanta Siri Hatlen preassadieđáhusas.
Goalmmádasoassi jerrojuvvon olbmuin geat orrot okto muitalit ahte sii leat eambbo okto luomuid áigge go muđui jagis.
Rukses Ruossa presideanttas lea čielga ávžžuhus:
– Váldde oktavuođa singuin geaiguin it leat háleštan guhkes áigái, ovdamearkka dihte ustibiin, fulkkiin, ránnjáin dahje bargoustibiin. Buohkat liikojit dasa ahte soames váldá oktavuođa. Telefovnnas háleštit dahje bovdet mátkái dahje gáfestallat sáhttá mearkkašit ollu, dadjá Hatlen.
(©NTB)
