-Almmuhus-
-Almmuhus-
-Almmuhus-
OĐĐASATKirku SOS dieđiha ahte okto­vuohta lassána

Kirku SOS dieđiha ahte okto­vuohta lassána

-

-

Kirku SOS muitala ahte oktiibuot 2.256 olbmo leat sidjiide čuojahan juovlamánu 23. gitta 27. beaivái. Dat leat 450 čuojaheami jándoris. Ovtta diimmus leat de birrasii 19:s ohcalan olbmo geainna sáhttet háleštit. Duođalašvuođa dássi ságastallamiin lea lassánan.

– Oktovuohta ja lossa miella lea stuorra hástalus dáid ságastallamiin, erenoamážit dán jagi loahpas, lohká Kirkens Bymisjon váldočálli Lasse Heimdal preassadieđáhusas.

Okta goalmmátoassi dahje 30 proseantta roassotelefuvnnain leamaš oktovuođa birra, diibmá lei 19 proseantta. SOS-chat.no chatbálvalusas maid eanaš nuorat geavahit, leamaš 209 ságastallama dáid juovlabasiid. Heimdal čilge ahte Kirkens SOS lea vuohttán ahte oktovuođa ja iešsorbmenjurdagiid ságastallan lea mealgat lassánan. 

– SOS-chat.no:s lea oktovuođa ságastallan golmma geardde eambbo lassánan diimmá juovllaid ektui. Olusat min eaktodáhtolaš bargiin muitalit ahte olusat čilgejit sii dovdet iežaset dorvvu haga, ahte eallin lea čáhppat ja bávččas, lohká Heimdal ja lasiha:

– Olusat muitalit ahte leamaš hirbmat lossat sidjiide čuojahit Kirkens SOS:i, erenoamážit vuosttaš geardde. Muhto ávkkuhii hirbmat olu beassat min eaktodáhtolaš bargiin háleštit. Dađi bahábut eat geargga buohkaiguin háleštit.

Son ávžžuha olbmuid váldit oktavuođa skihpáriiguin, bargoskihpáriin, oahpes olbmuin dahje bearašlahtuin geat soitet leat okto dáid áiggiid amas ii oktage láhppo dorvvuhisvuhtii.

-Almmuhus-