– Leat oallugat geat dovdet iežaset okto ja mis leat maid leamašan duođalaš ságastallamat iešsorbmema birra, dieđiha Girku SOS.
Veahkketelefovnna, Girku SOS vásáhus lea ahte olbmuide dovdo oktovuohta earenoamáš váttisin, seavdnjadin ja bávččasin juovllaid áigge. Sii jahkket ge ahte sivvan dasa sáhttá leat ahte lea váttis eallit pandemiijaáiggis, mii buktá sihke balu ja gáržžidemiid olbmuid gaskkii.
– Gaskal juovlamánu 23. beaivvi ja juovlamánu 28. beaivvi vástidii Girku 2885 telefonságastallama. Dat leat 481 ságastallama juohke beaivvi. Mii oaidnet dan seamma maid oaidnet eará basiid áigge, namalassii ahte olbmot dovdet iežaset okto, lohká Girku SOS generálačálli Lasse Heimdal preassadieđáhusas.
Olu ságastallamat iešsorbmema birra
Heimdal muitala ahte dáin ságastallamiin lei 15,7 proseanttas fáddán iešsorbmen. SOS-chat, mii lea Girku chat-bálvalus, lea eanas geavahuvvon nuoraid gaskka.
– Girku SOS ávžžuha buohkaid váldit veaháš eambbo vára nubbi nuppis basiid áigge ja maiddái ovddasguvlui. Lea ge dat ránnjá, bargoskibir dahje ustit gii oaidná ja berošta. Moddjes sidjiide geaid ovddal boađát dahje seavvil ránnjái. Vel dakkár smávva dahkku ge lea buorre «dálkkas», lohká generálačálli.
Heimdal lohká ahte ii leat dehálaš gávdnat daid rivttes sániid maid dadjá go deaivvada olbmuiguin geat leat lossa dilis. Deháleamos lea čájehit beroštumi ja buorredáhtolašvuođa. Vel árgabeaiságastallan ránnjáin sáhttá čájehit beroštumi.
