Norgga ráđđehus almmuha ahte Barentsčállingoddi bisuhuvvo, muhto fokusdoaimmat sirdašuvvet Davviriikkaide.
Barentsčállingoddi galgá ain leat guovddáš reaidu davviguovlluid politihkas, muhto stuorimus návccat das galget nannet Davvi-Suoma, Davvi-Ruoŧa ja eamiálbmogiid ovttasbarggu regiovnnas.
– Min mielas dat lea buorre go ráđđehus sávvá addit Barentsčállingoddái ođđa bargguid. Maŋŋá go álggii soahti Ukrainas, de leat oaidnan ahte «folk til folk» ovttasbargu Ruoššain šattai hástaleaddjin ja váttisin. Dat unnui sakka. Olu prošeavttain, maiguin mii leat bargan Barentsčállingottis, lea Davviriikkaid dimenšuvdna. Mii jurddašit sáhttit váikkuhit bures daid ođđa doaimmaid bokte maid ráđđehus dál sávvá, dadjá konstituerejuvvon beaivválaš jođiheaddji Marit Egholm Jacobsen preassadieđu bokte.
Ovddasvástadus sirdašuvvá
Barentsčállingoddi lea leamašan Norgga Olgoriikadepartemeantta vuollásaš go váldobargun lea leamašan hukset ovttasbarggu Ruošša aktevraiguin. Dál sirdašuvvá čállingoddi Gielda- ja guovlodepertemeantta háldui. «Folk til folk» sorjjasmeahttun ovttasbargu Ruošša aktevrraiguin galgá joatkašuvvat ain boahtteáiggis.
Proseassat mat gusket Barentsčállingotti ođđa doaimmaide ja sirdašeapmi Olgoriikadepartemanttas Gielda- ja guovlodepartementii galget leat sajis 2024:s.
