Elin Anna Labba bivnnuhis girji bággojohtimiid birra «Hearrát dat bidje min» šaddá dál vuođđun ođđa Giron Sámi teáhtera teahterbihttái.
Leat Uppsala stádateáhter ja Giron Sámi Teáhter mat ovttasbarget ođđa čájálmasas «Hearrát dat bidje min», mii lea bággojohtimiid birra man vásihedje Ruoŧa beale boazosámit čuohtejagi áigi.
Giron Sámi Teáhtera hoavda Åsa Simma dadjá preassadieđáhusa bakte ahte bággojohtimat leat sevdnjes oassi Ruoŧa historjjás.
– Stáda bággojohtimat leat sirren sámi sogaid ja oktavuođaid. Go johte eará eatnamiidda gos báikkálaš sámit fertejedje váldit vuostá daid sámiid geat ledje bákkuin šaddan guođđit iežaset árbevieruid ja eatnamiid. Sii geat bággojohte šadde vásihit ágibeaivválaš áibbaseami ruovttuluotta árbeeatnamiidda. Maiddái bohccot áibbašedje ruoktot. Danin ferte dat muitalus muitaluvvot, lea historjá mii ii gávdno čállon historjágirjjiin.
Johtit miehtá
Uppsala stádateáhterhoavda Petra Brylander illuda ovttasbargui Girona sámi teáhteriin.
– Illudit muitalit dan garra ja deaŧalaš muitalusa lávddis. Bihttá galgá čájehuvvot sihke Uppsalas ja miehtá Sámi, cealká son.
«Hearrát dat bidje min» teahterbihtá galgá Malin Stenberg bagadallat. Giehtačállosa lea Stina Oscarson hábmen. Vuosttas čájálmas lea ođđajágemánus 2024 Uppsala Stádateáhteris. Maŋŋel dan galgá bihtá johtit Sámis ja muđui Ruoŧas.
